Bokstan áielder arasyndaǵy álem chempionatynda búgin qazaqstandyq eki boksshy alǵashqy jekpe-jeginde jeńiske jetti, dep habarlaidy QazAqparat.
Túrkiianyń Ystanbul qalasynda ótip jatqan álem chempionatynda el quramasynan Jaina Shekerbekova (52 keli) Pýerto-Riko elinen kelgen Melodi Vargasty aiqyn basymdyqpen jeńdi.
Sondai-aq, taǵy bir qazaqstandyq Karina Ibragimova (57 keli) rýmyniialyq Klaýdiia Nechitany tize búktirdi.
Búgin taǵy eki boksshymyz sharshy alańǵa shyǵady. Aldymen kúndizgi sessiiada Aida Ábikeeva (63 keli) aljirlik Imane Helifpen qolǵap túiistiredi.
Al keshki sessiiada Nadejda Riabets (75 keli) túrkiialyq Býshra Ishildarmen kezdesý ótkizedi.
Eske salsaq, budan buryn el quramasynan Valentina Halzova (70 keli) keniialyq Lorna Kýsa Simbiden, Alýa Balqybekova (48 keli) kanadalyq Priianka Dillonnan basym tústi.
Sondai-aq, dúbirli dodada elimizdiń atynan Nazym Qyzaibai (50 keli), Jaina Shekerbekova (52 keli), Dina Jolaman (54 keli), Karina Ibragimova (57 keli), Rimma Volosenko (60 keli), Aida Ábikeeva (63 keli), Dariǵa Shákimova (66 keli), Nadejda Riabets (75 keli), Gúlsaia Erjan (81 keli) jáne Lázzat Kúngeibaeva (81 keliden joǵary) synǵa túsedi.
Álem chempionaty 20 mamyrda máresine jetedi.
