Qazaqstan boksshy Qamshybek Qońqabaev Reseidiń Ekaterinbýrg qalasynda ótip jatqan álem chempionatynyń jartylai finalyna shyqty, dep habarlaidy "Ult aqparat".
Boksshymyz 91 keliden joǵary salmaqta búgin Nelvi Tifakpen sheberlik baiqasty.
Qamshybek biylǵy álem chempionatynda buǵan deiin bir ǵana jekpe-jek ótkizdi. Jarystyń 1/8 finalynda ol ispaniialyq Aiýb Gadfadan basym tústi.
Qamshybek Qońqabaev 1991 jyly 18 qarashada dúniege kelgen. Búgingi kúnge deiin 2017 jylǵy álem chempionatynda kúmis júldeni ielense, sol jyly Aziia chempionatynda ekinshi oryn aldy.
Buǵan deiin qazaqstandyq boksshylar qatarynan Sáken Bibosynov (52 keli), Tursynbai Qulahmet (75 keli) jáne Vasilii Levit (91 keli), Bekzat Nurdáýletov (81 keli) pen Abylaihan Júsipov (69 keli) jartylai finalǵa joldama alǵan edi.
Al Qairat Eráliev alǵan jaraqatyna bailanysty ózbek jigiti Mirazizbek Mirzahalilovke jol berdi.
