Qazaqstandyq boksshy Abylaihan Júsipov Reseidiń Ekaterinbýrg qalasynda ótip jatqan Álem chempionatyn sátti bastady, dep habarlaidy "Ult aqparat".
Qazaqstandyq boksshy 69 keli salmaqta 1/8 finaldyq saiysta tailandtyq Výttichai Masýkpen qolǵap túiistiredi. Qarsylasy buǵan deiin eki márte Aziia chempiony jáne 2015 jyly álem chempionatynda qola júldeger atanǵan.
Abylaihan qazirge deiin 2017 jyly Aziia chempionatynda altyn alsa, sol jyly álem chempionatynda qola júldege qol sozǵan bolatyn. Sondyqtan búgingi básekede ózin jaqsy qyrynan kórsetti. Tóreshiler biraýyzdan qazaqstandyq boksshynyń jeńisin moiyndady. Nátijesinde ol qarsylasynan 5:0 esebimen basym túsip, shirek finalǵa joldama aldy.
Búgin taǵy bir qazaqstandyq boksshy Tursynbai Qulahmet sharshy alańǵa shyǵady. Keshki jekpe-jekter Nur-Sultan ýaqytymen 20.00-de bastalady. Ol AQSh boksshysy Haver Martinespen sheberlik baiqasady.
Buǵan deiin Qazaqstan boksshylary qatarynan Qairat Eraliev (57 keli) pen Bekzat Nurdáýletov (81 keli), Vasilii Levit (91 keli) jeńiske jetip, jarystyń 1/8 satysyna joldama aldy.
Biylǵy álem chempionatynda qazaqstandyq qurama sapynda segiz sańlaǵymyz synǵa túsýde. Olardyń qatarynda Sáken Bibosynov (48 keli), Qairat Eráliev (57 keli), Zakir Safiýllin (63 keli), Abylaihan Júsipov (69 keli), Tursynbai Qulahmet (75 keli), Bekzat Nurdáýletov (81 keli), Vasilii Levit (91 keli) jáne Qamshybek Qońqabaev (91 keliden joǵary) bar.
