Aýyr salmaqtaǵy qazaqstandyq kásipqoi boksshy Jan Kosobýtskii poliak Kamil Sokolovskidi nokaýtpen jeńdi. Bul týraly "Ult aqparat" VKontakte áleýmettik jelisindegi «Qazaqstan kásipqoi boksy» paraqshasyna silteme jasap habarlaidy.
On raýndqa sozylǵan kezdesýde qazaqstandyq sportshynyń basymdyǵy anyq baiqaldy. Besinshi raýndta Jan qarsylasyn nokdaýnǵa túsirgen. Qazaqstandyq boksshy ringtegi jeńisin onynshy raýndta toilady. Ol «djeb» ádisimen Kamil Sokolovskidi sulaptyp túsirdi.
Byltyr Jan Kosobýtskii salmaǵy 146 kg qarsylasyn birinshi raýndta nokaýtqa jibergen bolatyn.
31 jastaǵy Arqalyq qalasynyń týmasy Jan Kosobýtskii 2017 jyldan beri kásibi boksta óner kórsetip júr. Buǵan deiin 14 jekpe-jek ótkizip, barlyǵynda jeńiske jetti. Sonyń ishinde 13 jekpe-jekti merziminen buryn aiaqtady.
