Almaty oblysynda BMW kóligimen blokposty soǵyp, 2 politseidiń ólimine sebepker bolǵan júrgizýshige qatysty sot otyrysy bastaldy, dep habarlaidy QazAqparat.
Azat Azamatovqa qatysty isti Qarasai aýdandyq sotynyń sýdiasy Mádi Kóshekbaev qaraýda. Sot barysynda prokýror aiyptaý aktisin oqyp berdi. Prokýrordyń aitýynsha, 25 mamyrda tańerteń BMW júrgizýshisi Almaty oblysyndaǵy № 4 blokposty qiratyp ótken. Sol kezde ol mas bolǵan.
«Meni túnde burynǵy áriptesterim Kóksai aýylyna shaqyrdy. Biz sol kúni kólikte syra ishtik. Sodan keiin uiyqtaýǵa jattym. Ary qarai eshteńe esimde joq. Men aýrýhanada oiandym», - deidi aiyptalýshy.
Prokýrordyń suraqtaryna jaýap bergen Azamatov sol túni 2-3 bótelke syra ishkenin aitty. Ol anasynyń atyna tirkelgeni BMW markaly avtokólikti basqarǵan.
Sonymen qatar, Azamatov 21 mamyrda jumystan shyqqanyn aitty. Aryzdy 20 mamyrda jazǵan. Ol 2014 jyldan bastap quqyq qorǵaý organdarynda jumys istegen.
«Buǵan deiin mende bir tártiptik zań buzýshylyq boldy», - dep jaýap berdi zardap shekken politseidiń qorǵaýshysy qoiǵan suraqqa.
«Qurmetti sot, qurmetti jábirlenýshiler, men óz kinámdi tolyqtai moiyndaimyn», - dep Azamatov óz kinásin moiyndady.
Aita keteiik, sot otyrysy zardap shekken taraptardyń bolmaýyna bailanysty bir aptaǵa shegerilgen bolatyn.
Almaty oblysynyń prokýratýrasy 28 mamyrdaǵy jol apatyna bailanysty A.Azamatovqa qatysty sotqa deiingi tergeý isi bastalǵany týraly habarlaǵan bolatyn. Onyń is-áreketine bailanysty QR QK 345-babynyń 4-bólimimen (mas kúiinde kólik aidap, eki nemese odan kóp adamnyń qazasyna ákelgen jol apatyn týdyrý) boiynsha qylmystyq is qozǵalǵanyn aitqan.
Oǵan deiin qylmystyq is QR QK 99-babynyń 2-bólimi boiynsha qaralǵan edi.
Eske salaiyq, 25 mamyr tańǵy saǵat 05:26-da BMW markaly kólikti basqarǵan 28 jastaǵy júrgizýshi mas kúiinde blokpostaǵy politsiia kóligin soqty. Sol jerde eki politsiia qyzmetkeri kóz jumdy.
Al zardap shekken úshinshi politsei aýrýhanada esin jiyp, jazylyp shyqty.
Keiin QR Ishki ister ministri Erlan Turǵymbaev qylmystyq istiń mán-jaiyn tergeýdi Ishki ister ministrligi ózine alǵanyn málim etti.
Osy oqiǵadan keiin Almaty qalalyq Politsiia departamentiniń 9 qyzmetkeri tártiptik jazaǵa tartyldy. Úsh laýazymdy qyzmetker jumysynan bosatyldy .
