Batys Qazaqstan oblysynda Tasqala aýyly karantinge jabyldy, dep habarlaidy QazAqparat.
Aýdan ákimi Aldiiar Halelovtiń Feisbýktegi paraqshasynda málim etkenindei, aýdan aýmaǵynda qaýipti virýstyń taralý qaýpi seiilmei otyr.
Aýdanda epidemiologiialyq jaǵdai turaqsyz bolyp, sońǵy táýlikte virýs juqtyrǵandar úsh adamǵa ósken. Osyǵan bailanysty aýdandyq bas memlekettik sanitar dárigeriniń qaýlysyna sáikes 28 mamyr kúngi saǵat 00.00-den bastap Tasqala aýylyn karantinge jabý týraly sheshim qabyldandy.
Kúni búginge deiin Tasqala aýyly boiynsha 19 turǵyn indetke shaldyqsa, sonyń 9-y jazylyp shyqty. Sonymen qatar basqa el men aimaqtan kelgen 28 aýyl turǵynynan da koronavirýs tabylyp otyr. «Jumyla kótergen júk jeńil», demekshi, bul kúrdeli kezeńnen aman-esen shyǵýymyz árqaisysymyzdyń qolymyzda. Sondyqtan da aýdan turǵyndarynan qabyldanǵan sharaǵa túsinistikpen qarap, únemi betperde men qolǵap kiip, antiseptik qoldaný, basqa da sanitarlyq talaptardy qatań saqtaý suralady», dedi aýdan basshysy.
BQO ákimdiginen alynǵan málimetke qaraǵanda, koronavirýs juqtyrǵan sońǵy 21 adamnyń 15-i – buryn aýyrǵandarmen qarym-qatynasta bolǵandar.
Tórt adamnan profilaktikalyq maqsatta synama alynǵan kezde anyqtaldy.
Eki adam – Reseide jumys jasaityn Shymkent pen Almaty qalasynyń turǵyndary. Bular «Tasqala» jáne «Aqsai» avtoótkelderinen ótkennen keiin karantindik statsionarǵa jatqyzylǵan.
Osylaisha oblysta aýyrǵandar sany 493-ke jetti.
Eske sala keteiik, budan buryn BQO-da sońǵy on kúnde koronavirýs juqtyrǵandardyń 70 paiyzǵa óskenin jazǵan bolatynbyz.
Sondai-aq, oblysta Syrym aýdany men Jánibek aýylynda eki aýyl karantinge jabylǵan bolatyn.
