QR Ekologiia, geologiia jáne tabiǵi resýrstar ministri Maǵzum Myrzaǵaliev Batys Qazaqstan oblysyna jumys sapary barysynda Varfolomei sý qoimasynyń jaǵdaiymen tanysty.
Óńirdegi sý salasynyń mamandary vedomstvo basshysyna egistikterge sýdyń jetispeýshiligi máselesi men sý qoimalarynyń ahýaly týraly baiandady, dep habarlaidy "Ult aqparat" QR Ekologiia, geologiia jáne tabiǵi resýrstar ministrliginiń Telegram kanalyna silteme jasap.
Oral qalasynan 440, Qaztalov aýdanynyń ortalyǵynan 70 shaqyrym qashyqtyqta, «Kishi ózen» ózeninde ornalasqan qoima memleketaralyq mándegi sý toraby bolyp esepteledi. Qoima Kishi ózen sýyn Reseidiń Saratov oblysy men Qazaqstannyń Batys Qazaqstan oblysyna bólýge, eki oblystyń limandaryna sý ózindik aǵynmen berilýi úshin sý tiregin qurýǵa arnalǵan.
Al Úlken ózen boiynsha Resei Federatsiiasynan táýeldilikti azaitý boiynsha qazir jańa sý qoimasyn salý josparlanyp otyr. Ol Úlken ózende, Qaztalov aýdanynyń Jalpaqtal aýylynda ornalasady. Sonymen qatar, óńirdiń ońtústik aýdandaryna Úlken jáne Kishi ózenderi boiynsha turaqty sý jetip turýy úshin Edil ózeninen 135 mln tekshe metr sý alý máselesi qarastyrylýda. Bul maqsat úshin respýblikalyq biýdjettten 3,5 mlrd teńge bólý kerek.
Reseidiń Edil ózeninen Varfolomei qoimasy arqyly oblystyń Jánibek, Qaztalov, Jańaqala aýdandaryndaǵy 1637 gektar turaqty sýarmaly egistikke, 44018 gektar limandyq (saǵalyq) sýarý alqabyna, 324700 gektar sý basqan jaiylymdarǵa sý jiberiledi. Budan bólek, BQO-nyń ońtústik aýdandaryndaǵy ekologiialyq ahýaldy rettep otyrý úshin Aidyn, Saryaidyn, Qambaqty jáne Qamys-Samar kól aidyndaryna sý jiberilip otyrady. Sý qoimasynyń syiymdylyǵy - 23 mln metr kýb.
