Oralda eki balabaqshanyń 2 qyzmetkeri koronavirýs juqtyrdy, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaev brifingte málim etkenindei, atalǵan eki balabaqsha jabylyp, naýqastarmen bailanysta bolǵandar meditsinalyq baqylaýǵa alyndy.
Aita keteiik, búginde oblysta indetti juqtyrǵandar sany 414-ke jetti. Onyń 15-i – 14 jasqa deiingi balalar. 23 mamyr kúni 16 naýqas tirkelip, ósim 4,3 paiyz boldy. Al 24 mamyrda bir kúnde 28 syrqat anyqtalyp, ósim 7,2 paiyzǵa artty.
Naýqastardyń 252-si syrttan (Resei men Atyraýdan) kelgender bolsa, 162-si – buryn aýyrǵandarmen qarym-qatynas jasaǵandar. Sonyń ishinde 64-i densaýlyq saqtaý mekemelerinde anyqtalsa, beseýi – politsiia qyzmetkerleri. Sondai-aq Oral qalasynda bilim bóliminde 2 adamnyń, oqý ortalyǵynda muǵalim men shákirttiń, blokpostta jáne memlekettik kirister departamentinde bir-bir qyzmetkerden syrqattanǵany belgili boldy.
Aqjaiyq aýdanynda – 7, Bórlide – 7, Tasqalada – 11, Báiterekte – 5, Syrymda – 5, Terektide 2 adam tirkeldi. Oǵan qosa Jánibek aýdanynda eki adam jańadan qosyldy. Munyń bireýi – Qamysty aýylynda turatyn, jeke dúkeni bar kásipker. Ol taýar tasymaldaý úshin Oralmen eki ortada júrip-turǵan. Taǵy bir adam – Borsy aýylynyń turǵyny. Atyraý oblysyndaǵy Teńiz kenishinen kelgen odan alynǵan synama teris nátije kórsetkennen keiin úiinde oqshaýlanǵan. Alaida kóp uzamai dene qyzýy kóterilip, aýrý belgileri baiqalǵan. Qazirgi kezde naýqastarmen qarym-qatynasta bolǵandar anyqtalyp, zalalsyzdandyrý jumystary júrgizilýde. Jánibek aýdandyq bas memlekettik sanitar dárigeriniń qaýlysyna sáikes Qamysty jáne Borsy aýyldyq okrýgterinde karantin jariialanatyn bolady.
«Kúni búgin 342 adam oblystyq juqpaly aýrýlar aýrýhanasynda, provizorlyq jáne karantindik statsionarda jatsa, 1134 adam úilerinde oqshaýlanǵan. Osy kezge deiin 226 adam emdelip shyqty. Óńirde 15 maýsymǵa deiin uzartylǵan karantindik shekteý sharalarynyń jeńildetilýi nemese kúsheitilýi aldaǵy epidemiologiialyq ahýalǵa bailanysty bolmaq», - dedi N.Mustaev.
