Batys Qazaqstan oblysyna koronavirýsqa qarsy egiletin 5500 doza Gam-KOVID-Vak (Sputnik V) vaktsinasy jetkizildi, dep habarlaidy "Ult aqparat".
BQO densaýlyq saqtaý basqarmasynyń basshysy mindetin atqarýshy Arman Qalibekovtiń óńirlik kommýnikatsiialar qyzmeti alańynda málim etkenindei, sonyń ishinde 3250-i – birinshi, 2250 dozasy – ekinshi komponent.
Arman Talǵatulynyń sózine qaraǵanda, vaktsinatsiia keste boiynsha júrgiziledi. Birinshi kezekte bastapqy kezeńge ilikpei qalǵan, koronavirýsty juqtyrý qaýpi joǵary meditsina qyzmetkerleri egiledi. Odan ári muǵalimder men kúshtik qurylymdar qyzmetkerlerine ekpe salý josparlanýda.
Oblys boiynsha koronavirýsqa qarsy egý jumystary 1 aqpannan bastalǵan bolatyn. Al 22 aqpannan vaktsinanyń ekinshi komponentimen egý bastaldy.
«Birinshi dozadan keiin antidenelerdiń azdaǵan mólsheri nátijesinde uzaqqa sozylmaityn qorǵanysh áseri qalyptasady. Ekinshi doza birinshisiniń áserin kúsheitip, adam aǵzasyndaǵy antideneler sany kóbeiedi. Qazirgi tańda bastapqyda egilgenderdiń barlyǵy derlik (950-den astam adam) vaktsina aldy. Jaqyn kúnderi olardy ekinshi komponentpen egýdi aiaqtaý kózdelýde», dedi A.Qalibekov.
Kúni búgin 195 tósektik 4 karantindik statsionarda 77 naýqas emdelýde. Al 591 tósektik 7 infektsiialyq statsionarda 284 adam jatyr. 17 naýqas jansaqtaý bólimshesinde.
Invazivti jasandy tynys alý apparatyna 2, invazivti emes apparatqa 8, ottegi kontsentratoryna 7, ortalyqtandyrylǵan ottegi kózine 92 adam qosylǵan.
