BQO ákimi Ǵali Esqalievtiń tóraǵalyq etýimen jol qaýipsizdigin qamtamasyz etý máseleleri boiynsha keńes ótip, onda óz qyzmettik mindetin oryndamaǵan laýazym ielerine syn-eskertpe aityldy, dep habarlaidy "Ult aqparat".
Keńeste óńir basshysy bárinen buryn turǵyndar qaýipsizdigin saqtaý asa mańyzdy ekendigin, sondyqtan jol-kólik oqiǵalaryn boldyrmaý baǵytynda barlyq sharalardy alý qajettigin atap kórsetti.
Jiynda ótken jylǵy jáne biylǵy jol-kólik oqiǵalaryna taldaý jasaldy.
BQO politsiia departamenti bastyǵynyń mindetin atqarýshy, politsiia polkovnigi Janbolat Janshinniń málim etkenindei, biylǵy eki aida avtokólik rýline mas kúiinde otyrǵan 300-den astam júrgizýshi, sonyń ishinde 46-sy qaitalap jasaǵany úshin ákimshilik jaýapkershilikke tartyldy.
Mas kúiinde kólik júrgizgen júrgizýshilerdiń kinási saldarynan 3 jol apaty tirkelip, sonyń saldarynan 1 adam qaza taýyp, 11-i jaraqat aldy.
Óńirde maldyń qatysýymen jol-kólik oqiǵalaryn boldyrmaý maqsatynda barlyq aýdanda betimen júrgen mal qamalatyn 64 oryn belgilendi.
Mal jaiý erejesin buzǵany úshin ótken jyly 1600-den astam mal iesi ákimshilik jaýapkershilikke tartyldy.
«Eger ótken jyly maldyń qatysýymen bolǵan jol-kólik oqiǵasy saldarynan adam ólimi tirkelmese, biyl qaiǵyly jait oryn aldy. Jýyrda ǵana, 28 aqpan kúni Syrym aýdany aýmaǵynda VAZ-21011 avtokóligi jylqyǵa soǵylyp, sonyń saldarynan jolaýshy oqiǵa ornynda kóz jumdy», dedi Janshin.
Mal iesi anyqtaldy, ol ákimshilik jaýapkershilikke tartylatyn bolady.
J.Janshinniń sózine qaraǵanda, oblysta betimen júrgen maldy qamaityn 64 oryn belgilengenimen, bolǵan oqiǵa olardyń qaǵaz júzinde ekendigin kórsetti.
Syrym aýdanynda osyndai 15 oryn shyn mánisinde jumys jasamaidy. Aýyldyq okrýg ákimderi bul máseleni túpkilikti sheshpegen, jaýapty adamdar belgilenbegen.
Sonyń saldarynan mal jol boiynda emin-erkin júredi.
Osyǵan orai óńir basshysy Syrym aýdanynyń ákimi Tólegen Tóreǵalievke sógis jariialady.
Keńeste sondai-aq jol-kólik oqiǵalary jii bolatyn respýblikalyq mańyzy bar Oral-Atyraý jolyn qaita qurý jaiy da aityldy.
Qazirgi kezde bul joldy ortasyn bóle otyryp, 3 tehnikalyq sanattan 1-sanatqa aýystyrý úshin jobalyq-smetalyq qujattamasyn jasaqtaý kózdelýde.
«Ótken aptada Oral-Atyraý jolynda 4 jol apatynan 12 adam qaza taýyp, 8-i túrli jaraqat aldy. Taldaý kórsetkenindei, olardyń bári joldyń nashar kórinýi jaǵdaiynda júrgizýshilerdiń qaýipsizdikke kóz jetkizbesten, alda ketip bara jatqan kólikti basyp ozamyn dep, qarsy betke shyǵyp ketýinen bolǵan. Eger joldyń eki ortasy bólinse, avtokólikter betpe-bet túiispes edi», dedi Janshin.
