Batys Qazaqstan oblysynda qarasha aiynda 1053 adam koronavirýs juqtyrǵan, dep habarlaidy "Ult aqparat".
BQO sanitarlyq-epidemiologiialyq baqylaý departamentiniń basshysy Muhamǵali Aryspaevtyń óńirlik kommýnikatsiialar qyzmeti alańynda málim etkenindei, jeltoqsannyń alǵashqy kúnderi 104 adamnan indet tabyldy.
Sonymen qatar 12 adamnyń virýsy anyqtalmaǵan pnevmoniiaǵa shaldyqqany belgili boldy.
Aýyrǵandardyń 42,6 paiyzy (494-i) bir-birimen qarym-qatynas kezinde juqtyrǵan. Bul naýqastardyń úi karantininde sanitarlyq talapty, oqshaýlaný tártibin saqtamaityndyǵyn kórsetedi.
Eger shekteý sharalaryn kúsheitkenge deiin táýligine ortasha eseppen COVID-19-ben 37-38 naýqas tirkelse, qazirgi ýaqytta 32-den kelýde.
«Bul shekteý sharalarynyń tiimdiligin kórsetedi. Eger 11 qarashada «qyzyl aimaqta» bolsaq, odan keiin «sary aimaqqa» óttik. Al 25 qarashadan beri «jasyl aimaqtamyz». Sondyqtan bári de adamdardyń sanitarlyq talaptardy saqtaýyna bailanysty. Alda Táýelsizdik meiramy, odan keiin Jańa jyl merekesi keledi. Osyndai kúnderi de karantindi buzbaýymyz qajet. Sonda shekteý sharalaryn báseńdetýge múmkindik týady», dedi M.Aryspaev.
Oblysta qarasha aiynyń basynan beri monitoringtik toptar 105 nysanda sanitarlyq talaptyń buzylǵanyn anyqtady. QR Ákimshilik quqyqbuzýshylyq kodeksi 425-baby 1-bóligine sáikes 213 hattama toltyrylyp, 12 mln astam teńge aiyppul salyndy.
Sonyń ishinde kóp adamnyń qatysýymen 76 shara, betperde kimeýdiń 60, saǵat 23.00-den keiin jeke kólikpen júrýdiń 63, jumys rejimin buzýdyń 13 jáne qyzmetkerlerge termometriia júrgizbeýdiń 1 deregi tirkeldi.
