Qaiǵyly oqiǵa 15 tamyz kúni Batys Qazaqstan oblysy Terekti aýdany Poima aýylynda bolǵan, dep jazady Sputnik agenttigi "Moi gorod" portalyna silteme jasap.
26 jastaǵy Altynbek Joldas ata-anasymen birge Terekti aýdany Aqsýat aýylynda turypty. Týysy Balziia Serikovanyń aitýynsha, jas jigit áskerden kelip, vahtalyq ádispen jumysqa ornalasypty. Ata-anasyna da kómektesip júrgen. 14 tamyz kúni Altynbek dostarymen kezdesip, kólikke otyrǵan. Olar bankomattan aqsha alý úshin Poima aýylyna jolǵa shyǵypty.
"Jolda olardyń arasynda (Altynbek pen dostary arasynda) janjal bolǵan. Saldarynan Altynbek mashinadan "ushyp" ketken. Kólik joǵary jyldamdyqpen júrgen. Dostary toqtap kómek kórsetip, jedel járdem shaqyrýdyń ornyna saparlaryn jalǵastyrǵan. Biraq keiin qaita oralyp, Altynbekti mashinaǵa otyrǵyzypty. Muny tańerteń erte maldy óriske shyǵaryp bara jatqan aýyl turǵyndary kórgen", - deidi Balziia Serikova.
Onyń aitýynsha, osy sátte aýyl turǵyndary jigitterden ne bolǵanyn surapty. Biraq dostary Altynbektiń mas ekenin aityp, ony úiine jetkizemiz dep jaǵdaidy túsindirgen.
"Biraq olar ony úige jetkizgen joq. Aqsýatqa jetken soń, basqa kólikke otyryp, qalaǵa jolǵa shyǵypty. Alaida olar ýaqyt joǵaltyp alǵan. Bolǵan jaǵdaidy dárigerge, politsiiaǵa, tipti Altynbektiń ata-anasyna da aitpapty. Altynbektiń ózimen birge telefony bolǵan", - deidi marqumnyń týysy.
Sonymen qatar ol jigitter aýrýhanaǵa kelgende Altynbekti joldyń shetinen es-tússiz jatqan kúide taýyp alǵanyn aitqan. Dárigerler jas jigitti shuǵyl túrde aýrýhanaǵa jatqyzyp, operatsiia jasapty.
"Dárigerden jigittiń jaǵdaiy aýyr ekenin, ota 2-3 saǵat jasalatynyn estigen "dostary" jaibaraqat úilerine baryp, tamaqtanyp, aýrýhanaǵa qaita oralǵan. Medikter jigittiń komaǵa túskenin habarlaǵan. Sonda ǵana onyń dostary Altynbektiń anasyna bolǵan jaǵdaidy aityp berdi. Anasyn qalaǵa alyp keldik. Eki kún ótken soń, Altynbek esin jimastan kóz jumdy. 20 tamyz kúni jerledik", - deidi Balziia Serikova.
Altynbektiń anasy bolǵan jaǵdaiǵa sengisi kelmeitinin aitady.
"Biz jaǵdaidyń jigitterdiń aitqanyndai bolmaǵanyna senimdimiz. Bizdiń oiymyzsha, olar Altynbekti kólikten iterip jibergen. Tipti, olar ýaqytynda kómek kórsetpegen. Balamdy aman alyp qalýǵa múmkindik bar edi. Bul jigitter bizdiń aýyldan. Bala kezinen bir-birimen dos edi. Mundai jaǵdai aqylǵa syimaidy", - deidi marqumnyń týysy.
Balziia Serikova Altynbektiń dostary qaiǵyly oqiǵa bolardyń aldynda kólikke ishimdik iship otyrǵanyn, ári adam óliminen soń, ata-anasynan keshirim suramaǵanyn aitady.
Marqumnyń týystary politsiiaǵa aryz jazypty. Olardyń pikirinshe, politsiia qaiǵyly oqiǵany tergeýge asyǵar emes. BQO densaýlyq saqtaý basqarmasy Altynbek Joldas oblystyq kópbeiindi aýrýhanaǵa 15 tamyz kúni saǵat tańǵy 7:15 túskenin habarlady.
"Ol 17 tamyz kúni saǵat keshki 21:30-da kóz jumdy", - dedi vedomstvo qyzmetkerleri.
Oblystyq politsiia departamenti qaiǵyly oqiǵa sotqa deiingi tergeý reestrine tirkelgenin, tiisti sot-meditsinalyq saraptama taǵaiyndalǵanyn atap ótti.
"Tergeý toby barlyq dálel men boljamdy tekseredi", - deidi oblystyq politsiia departamentiniń baspasóz qyzmeti.
Sonymen qatar jýrnalister Altynbektiń dostarynan pikir alǵysy kelgen. Alaida Aqsýat aýylynyń ákimi olardyń BAQ ókilderimen kezdeskisi kelmeitinin aitypty.
