Batys Qazaqstan oblysynda jas bosanǵan eki ananyń ólimi boiynsha tekseris júrip jatyr. Bul týraly óńirlik kommýnikatsiialar qyzmeti alańynda ótken brifingide óńirde jumys saparymen júrgen QR Densaýlyq saqtaý ministri Ajar Ǵiniiat málim etti, dep habarlaidy QazAqparat tilshisi.
Ministrdiń aitýynsha, ana men bala densaýlyǵyn qorǵaý – saladaǵy basym baǵyttardyń biri.
«Osyǵan bailanysty óńirde oryn alǵan eki ananyń ólimine bailanysty komissiia jumys isteýde. Ár túrli taldamalar alynady, biopsiia jasaidy. Zertteýlerdiń qorytyndysy shyǵýy kerek. Qujattary tekserý organdarynda bolsa, olardy alyp qaraý qajet. Munyń bári ýaqyt alady. Komissiia qorytyndysy shyqqan kezde habarlanady», dedi A.Ǵiniiat.
Onyń sózine qaraǵanda, ótken jyly jalpy respýblika boiynsha ana men bala ólim-jitimi boiynsha ósim boldy, bul koronavirýs indetiniń órshýine bailanysty. Biyl elimizde ana ólimi 50 paiyzǵa azaiyp otyr. Al Batys Qazaqstan oblysynda qaiǵyly jaǵdailardyń oryn alýy alańdatady.
Jalpy, óńirde júkti jáne bosanǵan áielderge 17 meditsinalyq mekeme qyzmet kórsetedi.
«Búgin Oraldaǵy oblystyq perinataldyq ortalyqtyń jumysymen tanystym. Óńirde durys jabdyqtalǵan, halyqaralyq talaptarǵa sai keletin perinataldyq ortalyqtyń kerektigi talas týǵyzbaidy. Qazirgi ortalyqtyń jumys deńgeii tómen ekeni kórinip tur», dedi Densaýlyq saqtaý ministri.
Onyń atap ótkenindei, Memleket basshysynyń tapsyrmasyna sáikes óńirge jumys sapary kezinde ákimdikte oblystyń densaýlyq saqtaý salasynyń ózekti máseleleri talqylandy.
«Oblys ákimdigi meditsina salasy aldynda turǵan mindetterdi sheshý baǵytynda aldaǵy úsh jylǵa arnaiy jospar jasaǵan eken. Birinshiden, densaýlyq saqtaý nysandarynyń materialdyq-tehnikalyq bazasyn nyǵaitý. Sonymen qatar 2025 jylǵa deiin jańadan 46 nysan salý oilastyrylýda. Ekinshiden, bilikti kadrlarmen qamtamasyz etý. Mysaly, oblysta 270-ten astam dáriger jetispeidi. Sondyqtan jas mamandarmen tolyqtyrý, olardy oqytý, jergilikti jerde jaǵdai jasaý asa mańyzdy. Mine, osyndai kókeikesti máselelerdi sheshý úshin ministrlik te óz tarapynan qoldaý kórsetetin bolady», dep túiindedi sózin Ajar Ǵiniiat.
