Batys Qazaqstan oblysynda úshinshi toqsanda 11 qańtardan bastap 393 oqýshydan koronavirýs anyqtaldy, dep habarlaidy "Ult aqparat".
BQO sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń óńirlik kommýnikatsiialar qyzmeti alańynda ótken brifingide málim etkenindei, sonyń 226-sy dástúrli túrde, 167-si qashyqtan oqidy.
Nurlybek Ermekulynyń sózine qaraǵanda, 11-25 naýryz aralyǵynda qala men aýdandar bas memlekettik sanitar dárigerleriniń qaýlysyna sáikes 8 mektepte 15 synyp, oǵan qosa Tasqala aýdanynda 1 mektep karantinge jabyldy.
Jalpy, oqý jyly bastalǵannan beri 608 shákirtten (324-i dástúrli túrde, 284-i qashyqtan bilim alady) indet tabyldy.
Oblysta 1 qańtar men 25 naýryz aralyǵynda 5376 adamnyń aýyrǵany tirkeldi. Sonyń ishinde qańtarda – 1837, aqpanda – 1950, naýryzda 1589 adam koronavirýs juqtyrdy.
Naýryz aiynda naýqastarmen qarym-qatynasta bolǵan 3319 adam meditsinalyq baqylaýǵa alyndy.
Sońǵy aptada (19-25 naýryz) aldyńǵy aptamen salystyrǵanda, aýrý juqtyrý deńgeii 20,8 paiyzǵa (411-den 519-ǵa) ósken.
«Osy aida dertke shaldyqqandardyń 570-i nemese 35,8 paiyzy – jumys isteitinder, 423-i nemese 26,6 paiyzy – zeinetkerler, 286-sy nemese 17,9 paiyzy – jumyssyzdar, 134-i nemese 8,4 paiyzy – oqýshylar, 52-si nemese 3,2 paiyzy – meditsina qyzmetkerleri, 45-i nemese 2,8 paiyzy – muǵalimder», dedi N.Mustaev.
Sondai-aq naýryzda memlekettik shekaradan ótken 25032 adamnyń 5581-i – jolaýshylar. Anyqtamasyz ótken 621 jolaýshynyń ishinen bir adamnan koronavirýs tabyldy. Halyqaralyq júk tasymalymen ainalysatyn 12637 júrgizýshiniń 3264-inde anyqtama bolǵan joq. Bulardyń úsheýinde indet bar ekeni belgili boldy.
Óńirde monitoringtik toptar naýryzda 442 reid júrgizip, 4793 nysandy qamtydy. Úsh nysanda buzýshylyq anyqtaldy. 18 hattama toltyrylyp, 787590 teńge aiyppul salyndy.
