Batys Qazaqstan oblysynda úsh qyz balaǵa seksýaldyq sipattaǵy zorlyq jasaǵan turǵyn 16 jylǵa sottaldy, dep habarlaidy QazAqparat tilshisi.
BQO qylmystyq ister jónindegi mamandandyrylǵan aýdanaralyq soty 1978 jylǵy M-ǵa qatysty QR QK 121-baby 4-bóligine (seksýaldyq sipattaǵy zorlyq-zombylyq áreketterin jas balaǵa qatysty jasaý) sáikes aiyptaý úkimin shyǵardy.
M. ótken jylǵy qańtar aiynyń sońynda bas bostandyǵynan aiyrý oryndarynan jazasyn ótep kelgen. Sodan 2018 jyldyń aqpanynan 2019 jyldyń qańtaryna deiin úsh jas qyz balaǵa seksýaldyq sipattaǵy zorlyq-zombylyq áreketterin jasaǵan. Oǵan alty epizod boiynsha aiyp taǵyldy.
Jabyq ótken basty sot talqysy barysynda M. óziniń jasaǵan áreketterin moiyndady.
Sot jaza taǵaiyndaǵan kezde M-nyń buryn birneshe ret sotty bolǵanyn, jazany jeńildetetin jáne aýyrlatatyn mán-jailardy, jábirlenýshilerdiń zańdy ókilderiniń pikirlerin eskerdi.
M. QR QK 121-baby 4-bóligine sáikes aiypty dep tanylyp, QK-niń 60-baby negizinde ony pedagogikalyq jáne kámeletke tolmaǵandarmen jumys jasaýǵa bailanysty qyzmettermen ainalysý quqyǵynan aiyra otyryp, 16 jyl 2 ai merzimge bas bostandyǵynan aiyrý jazasy belgilendi.
Sottalýshy jazasyn qaýipsizdigi tótenshe (erekshe rejim) qylmystyq-atqarý júiesi mekemesinde óteitin bolady. Sondai-aq ol maskúnemdikten májbúrli túrde emdeledi.
Úkim zańdy kúshine endi.
Aita keteiik, oqiǵa Jánibek aýdanynda bolǵan. Jábirlenýshilerdiń ekeýi sottalýshynyń jaqyny, bireýi olardyń dos qyzy bolǵan.
