Batys Qazaqstanda Turǵyn úi qurylys jinaq bankiniń 1100 salymshysy jyl sońyna deiin «Nurly jer» baǵdarlamasy arqyly baspanaly bolady.
Oral qalasynda paidalanýǵa beriletin segiz úidiń arqasynda osyndai múmkindik týyp otyr dep málim etti banktiń jańa filialynyń ashylýynda sóz alǵan Batys Qazaqstan oblysy ákiminiń orynbasary Baǵdat Azbaev.
- Ár otbasy óz baspanam bolsa deidi, sondyqtan turǵyndar qolaily sharttar arqyly nesie beretin Turǵyn úi qurylys jinaq bankine senim artady. Biyl úiler Oral qalasynyń jańa eki shaǵyn aýdany – Zashaǵan jáne soltústik-shyǵys aýdandarynda salynady. Qazir qurylys qarqyndy júrip jatyr, jyldyń ekinshi jartysynda paidalanýǵa bere bastaimyz, - deidi BQO ákiminiń orynbasary.
Baǵdat Azbaevtyń aitýynsha, jyl basynan beri BQO boiynsha Turǵyn úi qurylys jinaq bankinen 2 myńǵa jýyq depozit ashylǵan.
Qazir aimaq boiynsha banktiń 68,6 myńnan astam salymshysy bar. Olardyń kóbi banktiń jái ǵana klienti emes, dosyna ainalyp úlgergen. Mysaly, Liýbov Iýlaeva. Ol bankke aqsha jinap, alty jyl buryn páter alǵan. Al, byltyr jyl sońynda onyń uly Mihail da ata-anasynyń jolyn qýyp, banktegi jinaǵynyń arqasynda baspanaly bolǵan.
– Bizdiń armanymyzǵa qanat bitirip, oryndalýyna at salysqan filial qyzmetkerlerine alǵysym zor. Bank qyzmetkerleriniń barlyǵyn jańa keńseniń ashylýymen quttyqtaimyn. Filial óte yńǵaily jumys isteidi, - deidi Liýbov Iýlaeva.
Banktiń 12 jyldan bergi taǵy bir klienti – Talǵat Igizov.
– Men TQJB filialyna alǵash ret kelgende, tek tórt qyzmetkeri bolǵan. Qazir banktiń jańa keń ǵimaraty salyndy. Sapaly qyzmet alý úshin bar jaǵdai jasalǵan. Elektrondy qyzmet, tólem terminaldary, smartfondarǵa arnalǵan qosymshasy bar. Sondyqtan, TQJB budan keiin de baspana máselesin sheshýde bizge kómektesedi dep senemin, onyń ústine, banktiń ózge qarjy uiymdarynan aitarlyqtai aiyrmashylyǵy bar, - deidi Talǵat Igizov.
Bank óz jumysynda sandyq tehnologiianyń múmkindikterin paidalanyp otyr. Onlain-qyzmetterdiń arqasynda depozit ashatyn ýaqyt qysqardy: qazir planshettiń kómegimen eki minýtta depozit ashýǵa bolady. Jýyrda Telegram áleýmettik jelisinde Qýanysh atty chat-bot tirkeldi. Chat-bot depozit pen nesie boiynsha búkil aqparat bere alady.
– Osyndai jańashyldyqtardyń barlyǵy klientterdiń ýaqytyn únemdep, yńǵaily qyzmet kórsetýge baǵyttalǵan. Qazir taǵy bir jańalyq – beinekabinalar paida boldy. Onda kezek kútpei-aq, virtýaldy túrde qyzmet alýǵa bolady, - deidi banktiń basqarma tóraiymynyń orynbasary Nurlan Aqshanov.
Saltanatty jiynnyń sońynda banktiń 38 salymshysy tozǵan jáne apatty úilerdiń ornyna salynǵan jańa úiden páter kiltterin aldy.
