Batys Qazaqstan oblysynda tótenshe jaǵdai talabyn buzǵan 8 meiramhana iesi qamaqqa alyndy, dep habarlaidy "Ult aqparat".
BQO politsiia departamentiniń baspasóz qyzmetinen túsken málimetke qaraǵanda, barlyǵy 13 ákimshilik is qozǵaldy.
Sonyń ishinde úsh kásipkerge aiyppul salynsa, 8-i qamaqqa alyndy. Taǵy eki is qaralý ústinde.
Mysaly, Oral qalasynda «Kórkem» meiramhanasy 19 naýryz kúni saǵat 22.00-den keiin qyzmetin toqtatpaǵan. Oral qalasy mamandandyrylǵan ákimshilik sotynyń qaýlysymen QR Ákimshilik quqyq buzý kodeksi 476-baby 6-tarmaǵyna sáikes meiramhana iesi 10 táýlikke qamaldy.
Osyndai «qyzmeti» úshin Oraldaǵy «Mister Doner» kafesi, «Pifkoff» syra bary, Aqjaiyq aýdany Chapaev aýylyndaǵy «Arman» kafesi ieleri de 10 táýlikke qamaqqa alyndy. Osy aýyldaǵy «Smail» kafesiniń iesine 2 táýlik ákimshilik qamaqqa alý jazasy kesildi.
Báiterek aýdany Michýrin aýylyndaǵy «Kemping Evraziia» kafesiniń iesi 13 táýlikke qamaldy.
Oraldaǵy «Svetlana» kafesiniń iesine 10 AEK kóleminde aiyppul salyndy.
Bókei ordasy aýdany Saiqyn aýylyndaǵy «Dýman» kafesinde 23 naýryz kúni 70-dei adam qatysqan qaraly jiyn bolǵan. Bul kafe iesine de 10 AEK kóleminde aiyppul salyndy.
Al Jańaqala aýdany Jańaqala aýylyndaǵy «Ǵaisa» meiramhanasynda 160 adam qatysqan saltanatty shara ótken. Jańaqala aýdandyq sotynyń qaýlysymen bul meiramhana iesi 3 táýlikke qamaldy.
BQO sotynyń baspasóz qyzmeti qaýlynyń zańdy kúshine enbegenin jetkizdi.
Eske sala keteiik, budan buryn BQO-da 22 myń maskany alyp ketip bara jatqan reseilik ustalǵanyn, 148 adamnyń meditsinalyq baqylaýǵa alynǵanyn jazǵan bolatynbyz.
