Batys Qazaqstan oblysynda tok soǵyp, eki qolynan aiyrylǵan bala oqiǵasy boiynsha qylmystyq is qozǵaldy, dep habarlaidy QazAqparat.
BQO politsiia departamenti baspasóz qyzmetinen túsken málimetke qaraǵanda, qazirgi kezde atalǵan derek boiynsha QR QK 371-baby 2-bóligine (abaisyzda aýyr zardaptarǵa ákep soqqan salǵyrttyq) sáikes sotqa deiingi tergeý amaldary júrgizilip jatyr.
«Atalǵan bap boiynsha kináli dep tanylǵan adam belgili bir laýazymdy atqarý nemese bir qyzmetpen ainalysý quqyǵynan úsh jylǵa deiingi merzimge aiyra otyryp, tórt myń AEK-ke deiingi mólsherde aiyppul salýǵa ne sol mólsherde túzeý jumystaryna ne bir myń saǵatqa deiingi merzimge bas bostandyǵyn shekteýge ne sol merzimge bas bostandyǵynan aiyrýǵa jazalanady. Tiisti saraptama taǵaiyndaldy. Qorytyndysy keiin belgili bolady», - dep habarlady vedomstvodan.
BQO ákiminiń baspasóz qyzmetinen málim etkenindei, óńir basshysy Ǵali Esqaliev aýrýhanada jatqan balamen kezdesip, jaǵdaiyn bildi.
Bes jasar Amanjol qazir basyn kóterip, óz betinshe júre alady. Jas bala psihologtardyń baqylaýyna alyndy.
Anasymen sóilesý barysynda oblys ákimi: «Máseleni ózimniń jeke baqylaýyma aldym. Jaraqat orny protezdi bekitýge yńǵaily bolǵan soń, zamanaýi protez salamyz. Otbasyńyzǵa jergilikti bilik tarapynan jan-jaqty qoldaý kórsetemiz» - dedi.
Kezdesýden soń Ǵ.Esqaliev elektr jelisine jetekshilik etetin orynbasary Temirhan Meńdiǵalievke, Batys Qazaqstan aimaqtyq elektr jelilik kompaniiasyna oblys aýmaǵyndaǵy barlyq transformatorlardyń qaýipsizdigi, olardyń qorshalýy, esikteriniń kilttenýi kerektigi jóninde qatań tapsyrma berdi.
Eske sala keteiik, budan buryn BQO-da tok soqqan eki balanyń aýrýhanaǵa túskenin jazǵan bolatynbyz.
