Batys Qazaqstan oblysynda sońǵy kezde Teńiz ken ornynan kelgender arasynda koronavirýs juqtyrǵandar kóbeiip otyr, dep habarlaidy "Ult aqparat".
BQO taýarlar men kórsetiletin qyzmetter sapasy men qaýipsizdigin baqylaý departamenti basshysynyń orynbasary Nurlybek Mustaevtyń brifingte málim etkenindei, Atyraý oblysyndaǵy Teńiz ken ornynda karantin jariialanýyna bailanysty 20 sáýirden bastap sonda vahtalyq ádispen jumys jasaityn adamdar óńirlerge qaitarylýda.
Sodan beri Batys Qazaqstan oblysyna Teńiz ken ornynan 1700-den astam adam keldi. Olardyń bári Atyraý oblysymen shektesetin Aqjaiyq aýdanyndaǵy blokposttan ótkennen keiin karantindik statsionarlarǵa jatqyzyldy. Solardyń ishinde kúni búginge deiin 20 adamnan koronavirýs anyqtaldy. Qalǵandary úi karantininde baqylanýda.
Jalpy, óńirde koronavirýs juqtyrǵan 217 adam tirkelse, sonyń 152-si – Reseiden kelgender. Olardyń deni – Qazaqstan, sonyń ishinde oblys azamattary. Óńirde turatyn bir áiel Germaniiadan kelgen. Sondai-aq, júk tasymalymen ainalysatyn Ózbekstan, Tájikstan jáne Qyrǵyzstan azamattary bar.
Sonymen qatar 42 naýqas – buryn koronavirýs juqtyrǵan adamdarmen qarym-qatynasta bolǵandar, munyń 37-si – meditsina qyzmetkerleri.
Óńirde osy kezge deiin 65 adam emdelip shyqty.
«Indetke qarsy sharalar odan ári jalǵasýda. Barlyq oblys turǵyndaryn karantindik shekteý sharalaryn, jeke gigienalyq talaptardy saqtaýǵa shaqyramyz», dedi N.Mustaev.
