Batys Qazaqstan oblysynda politsiia inspektory sýǵa ketken eki balany qutqaryp qaldy, dep habarlaidy Astana telearnasy.
Telearna málimetinshe, bes-alty jastaǵy balalar aýyl shetindegi kanaldan balyq aýlamaq bolǵan. Keiin qarmaqqa qurt izdegen bireýi sýǵa sekiripti. Dosyna ilesken taǵy bir búldirshin jaǵaǵa keri shyǵa almai qalǵan. Olardyń sýǵa batyp bara jatqanyn baiqaǵan politsiia inspektory kómekke umtylǵan.
"Bir bala sýǵa batyp bara jatqanyn, ekinshisi jaǵaǵa shyǵa almai jantalasyp júrgenin baiqadym. Dereý sheshinip sýǵa sekirdim. Birinshi balany birden jaǵaǵa shyǵardym. Sýdan alyp shyqqan ekinshi balanyń demi joq boldy. Biraq júregine massaj jasap, alǵashqy kómek kórsettim. Bul kezde esin jiyp alǵan balalardyń biri veligine minip alyp, aýylǵa qashyp ketti" - deidi tártip saqshysy Erjan Qýanyshev.
Taǵdyry qyl ústinde turǵan balalardy ajaldan qutqarǵan tártip saqshysyna aýyldyqtardyń alǵysy sheksiz. Óitkeni aýyldyń shetindegi bul kanal tereń kórinedi.
"Biz bulardyń sýǵa barǵanyn bilmeimiz. Ózderi oinap júrgen - bes-alty bala, joldas balalary. Ózimiz úiden birinshi kómek jasadyq. Spirtpen ysqyladyq, jaqsy bolyp ketti, sosyn qusty eki saǵattan keiin, jaqsy terledi" - deidi balalardyń biriniń atasy Qýandyq Ábdiǵaliev.
