Batys Qazaqstan oblysynda sońǵy eki jylda 909,8 myń gektar paidalanylmaityn aýyl sharýashylyǵy maqsatyndaǵy jerler anyqtaldy, dep habarlaidy "Ult aqpaart".
Oblys ákimi Ǵali Esqalievtiń Ortalyq kommýnikatsiialar qyzmeti alańynda ótken brifingide málim etkenindei, sonyń 113 myń gektary memleketke qaitaryldy.
Biylǵy on aida aýyl sharýashylyǵy jalpy óniminiń kólemi 1,6 paiyzǵa kóbeiip, 167,7 mlrd teńgeni qurady. Saladaǵy eńbek ónimdiligi ekinshi toqsanda 1,7 esege ósip, 720 myń teńgege jetti. Al investitsiialar kólemi 2,8 esege ulǵaiǵan.
Ákimniń sózine qaraǵanda, óńirde etti mal sharýashylyǵyn damytýǵa basymdyq berilýde.
Iri qara mal basy boiynsha BQO respýblikada tórtinshi orynda. Asyl tuqymdy iri qara mal ósirý jóninen úzdik úshtikti túiindeidi. Al etti baǵyttaǵy iri qara malyn ósirý boiynsha oblys ekinshi satyda tur.
Memleket basshysynyń aýyl sharýashylyǵy kooperativterin biriktirý tapsyrmasy boiynsha Tasqala aýdanynda pilottyq jobany júzege asyrý kózdelýde. Ol úshin birqatar kedergilerdi joiý qajet. Osyǵan orai Aýyl sharýashylyǵy ministrligine arnaiy usynys joldandy. Eger usynys qoldaý tapsa, aýyl turǵyndarynyń tabysy artatyn bolady.
«Búginde óńirdegi mal sharýashylyǵyn dóńgeletip otyrǵan sharýalar iri qara maldy tabiǵi jaiylymdy jerlerde ósirip otyr. Al dalada ósken maldyń ekologiialyq taza ónim beretini barshaǵa aian. Keńes dáýiri kezinde oblystaǵy jaiylym jerler kólemi 13 mln gektarǵa jetken. Al qazir biz tek 7 mln gektar jerdi paidalanyp otyrmyz. Iaǵni óńirdiń mal sharýashylyǵyn damytýdaǵy múmkindigi mol. Óitkeni osyndai taza, ekologiialyq ónimge suranys ta óte joǵary», dedi Esqaliev.
