باتىس قازاقستان وبلىسىندا سوڭعى ەكٸ جىلدا 909,8 مىڭ گەكتار پايدالانىلمايتىن اۋىل شارۋاشىلىعى ماقساتىنداعى جەرلەر انىقتالدى, دەپ حابارلايدى "ۇلت اقپاارت".
وبلىس ەكٸمٸ عالي ەسقاليەۆتٸڭ ورتالىق كوممۋنيكاتسييالار قىزمەتٸ الاڭىندا ٶتكەن بريفينگٸدە مەلٸم ەتكەنٸندەي, سونىڭ 113 مىڭ گەكتارى مەملەكەتكە قايتارىلدى.
بيىلعى ون ايدا اۋىل شارۋاشىلىعى جالپى ٶنٸمٸنٸڭ كٶلەمٸ 1,6 پايىزعا كٶبەيٸپ, 167,7 ملرد تەڭگەنٸ قۇرادى. سالاداعى ەڭبەك ٶنٸمدٸلٸگٸ ەكٸنشٸ توقساندا 1,7 ەسەگە ٶسٸپ, 720 مىڭ تەڭگەگە جەتتٸ. ال ينۆەستيتسييالار كٶلەمٸ 2,8 ەسەگە ۇلعايعان.
ەكٸمنٸڭ سٶزٸنە قاراعاندا, ٶڭٸردە ەتتٸ مال شارۋاشىلىعىن دامىتۋعا باسىمدىق بەرٸلۋدە.
ٸرٸ قارا مال باسى بويىنشا بقو رەسپۋبليكادا تٶرتٸنشٸ ورىندا. اسىل تۇقىمدى ٸرٸ قارا مال ٶسٸرۋ جٶنٸنەن ٷزدٸك ٷشتٸكتٸ تٷيٸندەيدٸ. ال ەتتٸ باعىتتاعى ٸرٸ قارا مالىن ٶسٸرۋ بويىنشا وبلىس ەكٸنشٸ ساتىدا تۇر.
مەملەكەت باسشىسىنىڭ اۋىل شارۋاشىلىعى كووپەراتيۆتەرٸن بٸرٸكتٸرۋ تاپسىرماسى بويىنشا تاسقالا اۋدانىندا پيلوتتىق جوبانى جٷزەگە اسىرۋ كٶزدەلۋدە. ول ٷشٸن بٸرقاتار كەدەرگٸلەردٸ جويۋ قاجەت. وسىعان وراي اۋىل شارۋاشىلىعى مينيسترلٸگٸنە ارنايى ۇسىنىس جولداندى. ەگەر ۇسىنىس قولداۋ تاپسا, اۋىل تۇرعىندارىنىڭ تابىسى ارتاتىن بولادى.
«بٷگٸندە ٶڭٸردەگٸ مال شارۋاشىلىعىن دٶڭگەلەتٸپ وتىرعان شارۋالار ٸرٸ قارا مالدى تابيعي جايىلىمدى جەرلەردە ٶسٸرٸپ وتىر. ال دالادا ٶسكەن مالدىڭ ەكولوگييالىق تازا ٶنٸم بەرەتٸنٸ بارشاعا ايان. كەڭەس دەۋٸرٸ كەزٸندە وبلىستاعى جايىلىم جەرلەر كٶلەمٸ 13 ملن گەكتارعا جەتكەن. ال قازٸر بٸز تەك 7 ملن گەكتار جەردٸ پايدالانىپ وتىرمىز. ياعني ٶڭٸردٸڭ مال شارۋاشىلىعىن دامىتۋداعى مٷمكٸندٸگٸ مول. ٶيتكەنٸ وسىنداي تازا, ەكولوگييالىق ٶنٸمگە سۇرانىس تا ٶتە جوعارى», دەدٸ ەسقاليەۆ.
