Shyńǵyrlaý aýdandyq sotynda burynǵy politsiia qyzmetkeri Mirlan Aqnurovqa qatysty úkim shyqty, dep habarlaidy QazAqparat.
BQO sotynyń baspasóz qyzmetinen túsken málimetke qaraǵanda, M.Aqnurov QR QK 366-baby 2-bóligine sáikes aiypty dep tanylyp, paranyń 50 eselengen mólsherinde 3 mln 950 myń teńge aiyppul salyndy.
Aiyppul sot úkimi kúshine engennen keiin bir ai ishinde tólenýi kerek.
Ol sondai-aq memlekettik qyzmette jáne basqa organdarda qyzmet atqarý quqyǵynan ómir boiyna aiyrylyp, politsiia kapitany shenimen de qoshtasty.
Sot talqysynda málim bolǵanyndai, Shyńǵyrlaý aýdany politsiia bóliminde aǵa memlekettik avtoinspektor qyzmetin atqaryp júrgen M.Aqnurov biylǵy mamyr aiynda Shyńǵyrlaý aýylynda úsh qabatty kóppáterlik úidiń salyna bastaǵanyn, oǵan qurylys materialdary jetkizilip jatqanyn biledi.
Sodan keiin qyzmet babyn paidalana otyryp, óz úiin turǵyzý úshin merdiger uiym ókilderinen qurylys materialdaryn para retinde almaq bolyp, jospar qurady. Sol maqsatta atalǵan nysanǵa ketip bara jatqan arnaiy kólikterdi toqtatyp, hattama toltyrady. Sóitip kásipkerlik ókilderine qysym jasap, ózine kómekke júginýge májbúrleidi.
M.Aqnurov 18 mamyr kúni Aqsai qalasynan 16 tonna katok ákele jatqan júrgizýshige hattama toltyryp, ony túske deiin ustaidy. Sol kúni ol júrgizýshige kómekke kelgen «Oral qurylys» JShS ókili E.Sharipovpen tanysady.
23 mamyr kúni Sharipovpen kezdesý barysynda qiyrshyq tas-qum qospasy jáne basqa qurylys materialdary tielgen árbir altynshy reistiń óz úii salynyp jatqan jer telimine jetkizilýi kerektigin aitady. Kelesi kúni Sharipov onyń talabyn oryndap, quny 6 myń teńge 20 tonna qiyrshyq tas-qum qospasyn politsiia qyzmetkeriniń aýlasyna túsiredi.
E.Sharipov M.Aqnurovtyń talaptarynyń zańsyz ekendigin túsinip, BQO boiynsha sybailas jemqorlyqqa qarsy qyzmetke júgingen.
Sodan keiin M.Aqnurov quny 73 myń teńge turatyn 2 tonna tsementti jetkizýdi talap etip, ony da alady. Osylaisha ol jalpy quny 79 myń teńge turatyn qurylys materialdaryna qol jetkizgen.
Sot úkimi kúshine engen joq.
