Jelide Batys Qazaqstan oblysy Báiterek aýdanynyń ákimi Marat Toqjanovtyń jinalys kezinde bylapyt sózder aitqany jazylǵan aýdiojazba taraǵan edi. Qol astyndaǵy qyzmetkerlerdi balaǵattaǵan sheneýnikke qatysty tergep-tekserý sharalary júrgizilip jatyr, - dep habarlaidy "Ult aqparat" Memlekettik qyzmet isteri agenttiginiń baspasóz qyzmetine silteme jasap.
"Buqaralyq aqparat quraldarynda memlekettik qyzmetshilerge qatysty jariialanǵan materialdarǵa monitoring júrgizý barysynda Batys Qazaqstan oblysy Báiterek aýdanynyń ákimi Marat Toqjanov tóraǵalyq etken májilistiń aýdiojazbasy anyqtaldy.
Memlekettik qyzmetshilerdiń moraldyq-ádeptilik beinesine qoiylatyn talaptar Qazaqstan Respýblikasy memlekettik qyzmetshileriniń Ádep kodeksinde aiqyndalǵan. Memlekettik qyzmetshiler áriptesterimen qyzmettik qarym-qatynasta dórekilikke, qadir-qasietin kemsitýge, ádepsiz jáne beiádep minez-qulyqqa jol bermeýi tiis", - delingen habarlamada.
Vedomstvo málimetinshe, Memlekettik qyzmet isteri agenttigi osy laýazymdy tulǵaǵa qatysty qyzmettik tergep-tekserý sharalaryn júrgizip jatyr. Nátijesi boiynsha tiisti sheshim qabyldanady.
"Ýralskaia nedelia" basylymynyń saitynda jariialanǵan málimetke sáikes, aýdiojazbanyń uzaqtyǵy - 1 saǵat 20 minýt. Sheneýnik san alýan balaǵat sózdi 150 ret aitqan. Sonyń ishinde qyzmetkerlerdiń ar-namysyna tietin sózder de az emes.
Bul jinalys naýryz aiynda bolǵan. Sol kezde qar erip, sý basý qaýpi týyndaǵan. Ákim qol astyndaǵy qyzmetkerlerine urysyp, týflidiń ornyna rezeńke etik kiiýdi buiyrady.
"Iá, sol kezde men qyzbalyqqa salyndym, qatty sózder aittym. Zań boiynsha olai isteýge quqyǵym joq, ony da bilemin. Biraq sol kezde sý basý qaýpi birinshi orynda turdy, sodan qatty sózderdi paidalanýǵa týra keldi. Osy keńesten keiin aýdanda birde-bir úidi sý basqan joq. Al qatty sózderim úshin barlyǵynan keshirim suraimyn", - deidi Toqjanov.
