Batys Qazaqstan oblysynda koronavirýstan qaitqandardyń 70 paiyzdan astamy – egde adamdar. Bul týraly brifingte oblystyq densaýlyq saqtaý basqarmasynyń basshysy Bolatbek Qaiýpov málim etti, dep habarlaidy "Ult aqparat".
Onyń aitýynsha, biyl indetten 110 adam kóz jumdy.
Sondai-aq 214 adam pnevmoniia dertinen ómirden ozdy.
Bolatbek Amangeldiulynyń sózine qaraǵanda, pandemiia ýaqytynan beri úiinde qaitys bolǵan birde-bir adam tirkelgen joq. Iaǵni oblystyq densaýlyq saqtaý qyzmeti emdelýshilerge aýrýhanalarda da, ambýlatorlyq jaǵdaida da barynsha kómek kórsetti.
Bastapqyda, sáýir-maýsym aralyǵynda indet Reseide jumys istep kelgen turǵyndardan, tranzittik júrgizýshilerden, Ózbekstan azamattarynan anyqtaldy. Al maýsym aiynan bastap oblys turǵyndary arasynda kóbeiip ketti. Mamyr aiynda Teńiz ken oryndarynda jumys isteitin 2700-den astam adam oblysqa oralsa, solardyń basym kópshiligi COVID-19 juqtyrdy.
Munyń bári shekteý sharalarynyń jeńildetilýimen tuspa-tus keldi. Turǵyndar jappai kóshege shyqty, dúken, saiabaqtardy aralap, serýendedi, toi, qonaqtyqqa baryp, kópshilik sharalar ótkizdi.
Ótken kezeńge jasalǵan taldaý kórsetkenindei, kovidtiń bar ekendigine senbeýshilik, sanitarlyq talaptardyń saqtalýyna jaýapsyz qaraý indettiń maýsym-shilde ailarynda jappai órshýine ákeldi.
«Jedel járdem shaqyrý táýligine 1400-ge jetip, eki ese kóbeigende, biz qiyndyqtarǵa tap boldyq. Barlyq naýqasty qamtý múmkin bolmai qaldy. Onyń ústine avtokólikterdiń sanitarlyq tazalyqtan ótýge tiis bolýy meditsinalyq kómekti keshiktirdi. Sol kezde jumysty kúsheitý maqsatynda 63 avtokólikpen qamtylǵan jedel járdem stansasynan bólek 123 mobildi top qurylyp, olar ambýlatorlyq em alǵan azamattarǵa qolushyn berdi. Oblys ákiminiń usynysymen barlyq memlekettik organdar avtokólik bólip, qoldaý kórsetti. Biz avtokólikterdi qalalyq emhanalarǵa bekitip berdik», dedi Bolatbek Qaiýpov.
Oblys kóleminde basqa da tiisti jumystardyń atqarylǵanyn aitqan densaýlyq saqtaý basqarmasynyń basshysy engizilgen shekteý sharalarynyń tiimdiligin, sonyń nátijesinde koronavirýsqa shaldyǵý kórsetkishi tómendegenin atap ótti.
«Qoǵamda sanitarlyq talaptardy tolyq saqtamaiynsha, asa qaýipti indetti jeńý múmkin emes. Adamdardyń ózin-ózi qorǵaýy ǵana koronavirýs juqtyrýdan aman shyǵatynyn tájiribe kórsetip otyr. Maska taǵyp, qoldy jii dezinfektsiialap, kópshilik sharaǵa qatysýdy qysqartýdyń ne qiyndyǵy bar. Ókinishke qarai, indettiń qaýpin sezinbeitinder áli de kóp. Ásirese, egde adamdardy saqtai bileiik», dep túiindedi sózin B.Qaiýpov.
Batys Qazaqstanda ótken táýlikte 5 adamnyń koronavirýs juqtyrǵany anyqtalyp, jalpy sany 6903-ke jetti.
