Batys Qazaqstan oblysynda koronavirýs juqtyrǵan áieldiń bireýi Saratovtan, ekinshisi Atyraýdan kelgen. Bul týraly oblystyq densaýlyq saqtaý basqarmasynyń basshysy Bolatbek Qaiýpov shuǵyl ótkizilgen brifing barysynda aitty, dep habarlaidy "Ult aqparat".
Onyń aitýynsha, ekeýi de – BQO turǵyndary, olar juqpaly aýrýlar aýrýhanasyna jatqyzyldy.
Qazirgi kezde aýyrǵan adamdarmen bailanysta bolǵandar anyqtalý ústinde.
Kúni búgin karantindik jáne provizorlyq statsionarda barlyǵy 65 adam jatyr, báriniń jaǵdaiy qanaǵattanarlyq.
BQO-nyń bas memlekettik sanitarlyq dárigeri Muhamǵali Aryspaevtyń sózine qaraǵanda, Reseiden kelgen áiel 24 naýryz kúni shekaradan ótken. Sodan keiin úiinde oqshaýlanǵan. Tórt-bes kúnnen soń aýrýdyń alǵashqy belgileri baiqalǵannan keiin provizorlyq gospitalǵa jatqyzyldy.
Jalpy, ekeýiniń de jaǵdaiy jaqsy. Aýrýdyń osy eki oshaǵy boiynsha karantindik jumystar júrgizilýde.
BQO ákimi Ǵali Esqaliev te Feisbýktegi óziniń paraqshasynda koronavirýs juqtyrǵan eki adamnyń tirkelgenin habarlap, aýrýdyń bastapqy belgileri paida bolǵan kezde jedel járdem shaqyrylyp, olardyń oqshaýlaý oryndaryna jetkizilgenin málimdedi.
Óńir basshysy epidemiologiialyq jáne ekonomikalyq jaǵdai boiynsha saýaldar týyndasa, WhatsApp +7 700 0 109 109 nómirine joldaýǵa bolatynyn jetkizdi.
