Batys Qazaqstan oblysynda 596 tósek-orny bar 8 infektsiialyq statsionarda 355 adam jatyr. Bul týraly oblys ákimi Ǵali Esqalievtiń tóraǵalyq etýimen ótken jedel shtab otyrysynda aityldy, dep habarlaidy "Ult aqparat".
BQO densaýlyq saqtaý basqarmasy basshysynyń mindetin atqarýshy Arman Qalibekovtiń málim etkenindei, qazirgi kezde juqpaly aýrýlar aýrýhanalary 59,6 paiyzǵa tolǵan.
Sonyń ishinde 15 adam jansaqtaý bóliminde jatyr.
Jyl basynan beri koronavirýstan 68 adam kóz jumdy.
Arman Talǵatulynyń sózine qaraǵanda, indettiń jańa shtamdarynyń burynǵyǵa qaraǵanda, juǵý kórsetkishi 70 paiyzǵa deiin jetedi. Baqylaý kórsetip otyrǵanyndai, britandyq shtamm basqa túrlerinen góri 1,7-2 ese tez taralady.
BQO sanitarlyq-epidemiologiialyq baqylaý departamentiniń basshysy Muhamǵali Aryspaev óńirde indettiń naýryz meiramdarynan keiin kúrt órship ketkendigin jetkizip, karantindik shekteý sharalaryn 16 sáýirge deiin uzartýdy usyndy.
Onyń aitýynsha, jyl basynan beri oblysta 5655, sonyń ishinde naýryz aiynda 1868 adamnan indet tabyldy. Sońǵy aptada (22-28 naýryzda – 538) aldyńǵyǵa (15-21 naýryzda – 511) qaraǵanda, aýrý kórsetkishi 5 paiyzǵa kóbeidi.
Naýryzda syrqattanǵandardyń basym kópshiligi nemese 69,9 paiyzy Oralda (1307), sondai-aq Bórli aýdanynda 9,7 paiyzy (183), Báiterekte 7,6 paiyzy (142) tirkelip otyr.
«Indetpen kúres bastalǵanyna bir jyldan asty. Sodan beri adamdar qarapaiym sanitarlyq talaptardy saqtaýǵa úirendi. Áitse de aýrý bizdi ainalyp ótedi dep saqtanbai júrgender, toi-sadaqa jasaýshylar áli de barshylyq. Eger bulai sozyla berse, karantin uzaq saqtalady. Jyl basynan beri 68 adam ómirden ozsa, aýrý juqtyrý kórsetkishi 20 paiyzǵa ósti. Koronavirýstyń jańa túrleri óte tez taraidy ári aǵzaǵa qatty áser etedi. Sondai-aq aýrý belgileri joq adamdar kópshilik jinalatyn jerlerge baryp, ózgelerge juqtyrýda. Munyń sońy qaiǵyly jaǵdailarǵa soqtyrýda. Indettiń óte qaýipti ekendigin túsinetin ýaqyt jetti», dedi Ǵ.Esqaliev.
