باتىس قازاقستان وبلىسىندا 596 تٶسەك-ورنى بار 8 ينفەكتسييالىق ستاتسيوناردا 355 ادام جاتىر. بۇل تۋرالى وبلىس ەكٸمٸ عالي ەسقاليەۆتٸڭ تٶراعالىق ەتۋٸمەن ٶتكەن جەدەل شتاب وتىرىسىندا ايتىلدى, دەپ حابارلايدى "ۇلت اقپارات".
بقو دەنساۋلىق ساقتاۋ باسقارماسى باسشىسىنىڭ مٸندەتٸن اتقارۋشى ارمان قاليبەكوۆتٸڭ مەلٸم ەتكەنٸندەي, قازٸرگٸ كەزدە جۇقپالى اۋرۋلار اۋرۋحانالارى 59,6 پايىزعا تولعان.
سونىڭ ٸشٸندە 15 ادام جانساقتاۋ بٶلٸمٸندە جاتىر.
جىل باسىنان بەرٸ كوروناۆيرۋستان 68 ادام كٶز جۇمدى.
ارمان تالعاتۇلىنىڭ سٶزٸنە قاراعاندا, ٸندەتتٸڭ جاڭا شتامدارىنىڭ بۇرىنعىعا قاراعاندا, جۇعۋ كٶرسەتكٸشٸ 70 پايىزعا دەيٸن جەتەدٸ. باقىلاۋ كٶرسەتٸپ وتىرعانىنداي, بريتاندىق شتامم باسقا تٷرلەرٸنەن گٶرٸ 1,7-2 ەسە تەز تارالادى.
بقو سانيتارلىق-ەپيدەميولوگييالىق باقىلاۋ دەپارتامەنتٸنٸڭ باسشىسى مۇحامعالي ارىسپاەۆ ٶڭٸردە ٸندەتتٸڭ ناۋرىز مەيرامدارىنان كەيٸن كٷرت ٶرشٸپ كەتكەندٸگٸن جەتكٸزٸپ, كارانتيندٸك شەكتەۋ شارالارىن 16 سەۋٸرگە دەيٸن ۇزارتۋدى ۇسىندى.
ونىڭ ايتۋىنشا, جىل باسىنان بەرٸ وبلىستا 5655, سونىڭ ٸشٸندە ناۋرىز ايىندا 1868 ادامنان ٸندەت تابىلدى. سوڭعى اپتادا (22-28 ناۋرىزدا – 538) الدىڭعىعا (15-21 ناۋرىزدا – 511) قاراعاندا, اۋرۋ كٶرسەتكٸشٸ 5 پايىزعا كٶبەيدٸ.
ناۋرىزدا سىرقاتتانعانداردىڭ باسىم كٶپشٸلٸگٸ نەمەسە 69,9 پايىزى ورالدا (1307), سونداي-اق بٶرلٸ اۋدانىندا 9,7 پايىزى (183), بەيتەرەكتە 7,6 پايىزى (142) تٸركەلٸپ وتىر.
«ٸندەتپەن كٷرەس باستالعانىنا بٸر جىلدان استى. سودان بەرٸ ادامدار قاراپايىم سانيتارلىق تالاپتاردى ساقتاۋعا ٷيرەندٸ. ەيتسە دە اۋرۋ بٸزدٸ اينالىپ ٶتەدٸ دەپ ساقتانباي جٷرگەندەر, توي-ساداقا جاساۋشىلار ەلٸ دە بارشىلىق. ەگەر بۇلاي سوزىلا بەرسە, كارانتين ۇزاق ساقتالادى. جىل باسىنان بەرٸ 68 ادام ٶمٸردەن وزسا, اۋرۋ جۇقتىرۋ كٶرسەتكٸشٸ 20 پايىزعا ٶستٸ. كوروناۆيرۋستىڭ جاڭا تٷرلەرٸ ٶتە تەز تارايدى ەرٸ اعزاعا قاتتى ەسەر ەتەدٸ. سونداي-اق اۋرۋ بەلگٸلەرٸ جوق ادامدار كٶپشٸلٸك جينالاتىن جەرلەرگە بارىپ, ٶزگەلەرگە جۇقتىرۋدا. مۇنىڭ سوڭى قايعىلى جاعدايلارعا سوقتىرۋدا. ٸندەتتٸڭ ٶتە قاۋٸپتٸ ەكەندٸگٸن تٷسٸنەتٸن ۋاقىت جەتتٸ», دەدٸ ع.ەسقاليەۆ.
