Byltyr mamyrda Oral-Atyraý tasjolynda Báiterek aýdany Ianaikino aýylynyń ákimi Aýǵan Álmurzin mas kúide kólik aidap kele jatqan kezinde ustalǵan bolatyn. Sheneýnik mas bolǵan, bul meditsinalyq tekseristen keiin rastaldy. Al jaqynda eks aýyl basshysy jańa aýylǵa ákim bolyp taǵaiyndalǵan, - dep habarlaidy Massaget portaly jergilikti "Moi GOROD" basylymyna silteme jasap.
Bir jyl buryn Álmurzin etika keńesiniń sheshimimen qyzmetinen bosatylyp, jeti jylǵa kólik júrgizý quqyǵynan aiyrylǵan bolatyn.
Al jaqynda Báiterek aýdany ákimdiginiń saitynda tórt aýyl ákimi sailaýdan ótip, Aýǵan Álmurzin Kóshim aýyldyq okrýginiń ákimi bolyp taǵaiyndalǵan.
Báiterek aýdany ákimi apparatynyń basshysy Nurjan Júzbatyrdyń aitýynsha, Aýǵan Álmurzin aýyl turǵyndarynyń sailaýy arqyly taǵaiyndalǵan. 80 paiyzǵa jýyq turǵyn daýys bergen.
"Iá, rasynda ol jumystan qýylǵan, biraq bul bedelin túsiretin fakt emes. Ol aýyl ákimi qyzmetinen bosatylǵannan keiin eki aidan soń memlekettik qyzmetker testinen ótip, Ianaikino aýyly ákimdigine bas maman bolyp jumys istedi. 12 jyldai Kóshim ákimdiginde jumys istegendikten, aýyl turǵyndarynyń ótinishimen ol kandidat retinde usynyldy. Ortalyq sailaý komiteti qarsy keletindei eshteńe tappady", - deidi apparat basshysy.
