Foto: pixabay.com
QR Indýstriia jáne infraqurylymdyq damý ministri Marat Qarabaev Batys Qazaqstan oblysyna jumys sapary barysynda turǵyndarmen kezdesip, suraqtaryna jaýap berdi, dep habarlaidy QazAqparat.
BQO qoǵamdyq keńes tóraǵasy, oblystyq máslihat depýtaty Erbol Salyqov respýblikalyq mańyzy bar Ónege-Bisen-Saiqyn baǵytyndaǵy jol qurylysyna qatysty saýal qoidy.
«Shalǵaida ornalasqan Bókei ordasy aýdanyn oblys ortalyǵymen bailanystyratyn atalmysh baǵyttaǵy jol qurylysy biyl bitedi degen resmi málimet bar, sony rastaisyz ba? Ekinshiden, Han ordasy aýylymen jalǵastyratyn 21 shaqyrym jolǵa jobalyq-smetalyq qujattama jasalǵanymen, merzimi ótip ketken. Osyny tezdetip jasap, qurylys bastaýǵa kómektesseńiz», dedi Salyqov.
Osyǵan orai jaýap bergen ministr Úkimet tarapynan jol qurylysyna jetkilikti qarjy berilip otyrǵanyn jetkizdi. Aitalyq, ótken jyly Batys Qazaqstan oblysyna osy maqsatqa 42 mlrd teńge qaralsa, biyl 50 paiyzǵa kóbeiip, 66 mlrd teńgege jetti. Sonyń ishinde Kaztalov-Ónege-Bisen joly qurylysyna 30 mlrd teńge bólindi. Mundai kólemdegi qarjy qaralǵan emes.
«Qajetti qarajat bólingennen keiin jumystyń tiimdi oryndalýyn ministrlikpen qatar jergilikti atqarýshy organdarmen birge qadaǵalaýy kerek. Qosymsha merdiger qajet bolsa, aityńyzdar. Han ordasyna jetkizetin 21 shaqyrym jol qurylysyn kelesi jyly bastap ketý úshin biyl konkýrs ótkizip, merdigerdi anyqtap qoiý kerek», dedi Marat Qarabaev.
«Atalmysh jol qurylysyna qatysty aitarym, biz oblys ákimdigimen biyl astyńǵy tósemdi bitirip, joldy qatynas úshin ashýǵa keliskenbiz. Ústińgi tósem kelesi jyly aiaqtalady. Osy sapar barysynda atalǵan jol qurylysy barysymen tanysyp, áli de naqtylai túsemiz», dedi QR Indýstriia jáne infraqurylymdyq damý ministrligi Avtomobil joldary komitetiniń tóraǵasy Tólegen Abdýllin.
