11 mamyr kúni Batys Qazaqstan oblysy Syrym aýdany Alǵabas aýylynyń turǵyny Talǵat Jumazov úiiniń aýlasynda jer qazyp júrip, adamnyń bas súiegin, qylysh pen bes jebeniń ushyn taýyp alǵan, dep habarlaidy "Ult aqparat".
Qylyshty tot bassa, jebeniń ushtary kógergen.
Aýdan ákiminiń orynbasary Aslanbek Sarqulovtyń aitýynsha, adamnyń bas súiegi men jádigerlerdiń qai ǵasyrǵa jatatynyn anyqtaý maqsatynda oblystyq tarih jáne arheologiia ortalyǵynan mamandar shaqyrtyldy.
«Syrym aýdanynda tarihi oryndar barshylyq. Sonyń ishinde el bastaǵan kósem, qol bastaǵan batyr Syrym Datuly tý ilip, qaraýyl qoiǵan áigili «Syrym shyqqan tóbe» Alǵabas aýylynan alys emes. Sondai-aq Jumaǵazy qaziret – «Dádem ata» kesheninde Ersary Ańqaty ózeniniń jaǵasynda Syrymnyń atalas aǵaiyny Ersary batyr Beketaiuly da jerlengen. Bul osy mańda talai urystyń ótkenin aiǵaqtaidy. Sonymen birge qylysh pen jebe ushynyń odan da kóne dáýirge tiesili bolýy ǵajap emes. Ony aiqyndaý arheolog ǵalymdardyń enshisinde», - dedi QazAqparat tilshisine A.Sarqulov.
