Batys Qazaqstan oblysynda adamdardyń bir-birine koronavirýs juqtyrýy jiilep otyr.
Bul týraly BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵali Aryspaev brifingte málim etti, dep habarlaidy "Ult aqparat"..
Aýyrǵandardyń basym kópshiligi nemese 89 paiyzy Oral qalasynda shoǵyrlanǵan. Sondai-aq oblystyń jeti aýdanynda koronavirýs juqtyrǵandar anyqtaldy.
Sońǵy úsh kúnde aýrýdyń ósý deńgeii 7 paiyzdan 9,2 paiyzǵa jetti. Munyń bir sebebi – buryn aýyrǵandarmen qarym-qatynasta bolǵandardyń bári tekserilýde.
Syrqattanǵandardyń 57,6 paiyzy nemese 265-i – syrttan kelgender. Sonyń ishinde 192-si – Reseidiń Samara, Saratov oblysy arqyly elge jetkender. Germaniia men Belarýstan kelgen bir-bir adamnan aýrý tabyldy.
Teńiz kenishinen kelgender arasynan 71 adamnyń dertke shaldyqqany belgili boldy. Ókinishke qarai, dene qyzýy kóterilse de, qaýipsizdikti saqtamaý saldarynan olardyń aýrýdy óz týystaryna, áieli, balalaryna juqtyrǵany anyqtaldy. Sondai tórt aýrý oshaǵynda 17 koronavirýs oqiǵasy tirkeldi.
Qarym-qatynasta bolǵan 189 adamnan aýrý tabyldy.
Ómir bolǵan soń, ólim-jitim kezdespei turmaidy. Syrym jáne Shyńǵyrlaý aýdanynda jerleý rásimine kóp adamnyń jinalǵany anyqtaldy.
Syrym aýdanynda tórt adam dertke shaldyqty. Sonyń ishinde bireýi óz otbasyndaǵy eki adamǵa jáne medbikege aýrý juqtyrdy. Aýrý belgileri baiqalǵan boida aýrýhanaǵa barmai, jedel járdem shaqyrsa, indet olai taralmas edi. Qazirgi kezde aýdanda karantin jariialanyp, naýqastarmen qarym-qatynasta bolǵandar tekserilip, synama teris nátije kórsetti.
Sonymen qatar Shyńǵyrlaý aýdanynda bir adamnan koronavirýs tabyldy. Endi epidemiolog mamandar sol jerleý rásimine qatysqan adamdardy anyqtap, tekserý jumystaryn júrgizip jatyr.
«Eń basty shart – adamdar kóshege shyqqanda, ara qashyqtyqty saqtaýy, kópshilik jiyndarǵa barmaýy kerek. Mysaly, Oraza aiy men ait kúnderi adamdardyń bir-birin qonaqqa shaqyrýy jiiledi. Sondai-aq avtobýstarǵa mingender, bazar, dúkenderge barǵandar ishinde betperdesiz júrgender az emes. Jolaýshy tasymaldaýshy kásiporyndar da dezinfektsiialyq, sanitarlyq talaptardy saqtai bermeidi. Eger olar muny jalǵastyrsa, sol baǵyttaǵy avtobýstar qozǵalysyn toqtatýǵa deiin sheshim qabyldanatyn bolady. Qoryta aitsaq, 15 maýsymǵa deiin uzartylǵan karantindik talaptardy saqtai alsaq qana shekteý sharalaryn jeńildetemiz», dedi M.Aryspaev.
