Batys Qazaqstan oblysynda 81 balanyń koronavirýs juqtyrǵany tirkeldi, dep habarlaidy "Ult aqparat".
Oblystyq bilim basqarmasy basshysynyń orynbasary Svetlana Temirǵalievanyń óńirlik kommýnikatsiialar qyzmeti alańynda ótken brifingide málim etkenindei, sonyń ishinde 72-si – mektep oqýshylary, 9-y – balabaqsha tárbielenýshileri, ekeýi – kolledj stýdentteri.
Solardyń ishinde 24-i jazylyp shyǵyp, sabaqtaryn jalǵastyrýda. Aýyrǵandardyń basym kópshiligi – qashyqtan oqityndar. Az bóligi shtattyq rejimde jumys jasaityn mektepte bilim alady.
S.Temirǵalievanyń sózine qaraǵanda, oblysta 379 memlekettik mektep bolsa, sonyń 251-i shtattyq, 128-i qashyqtan jumys jasaidy.
Oqýshylar sany 111 myńnan astam bolsa, sonyń 20 paiyzy (22868) shtattyq rejimde, 48 paiyzy (53640) qashyqtan oqytylýda.
Oblysta bastaýysh synyp shákirtteriniń 57 paiyzy (34684), mektepaldy daiarlyq synyptarynyń 54 paiyzy (4286) kezekshi synyptarmen qamtylǵan.
Qashyqtan oqityndardyń 17959-y qaitarymdy negizde mektepter balansyndaǵy kompiýterlermen qamtyldy. Birinshi kezekte kompiýterlermen jáne internetpen jetim balalar, ata-ana qamqorlyǵynsyz qalǵandar jáne erekshe bilim berý qajettilikteri bar, az qamtylǵan otbasylardan shyqqan balalar qamtamasyz etildi.
