BQO-nyń Bókei ordasy aýdanynda Ekinshi dúniejúzilik soǵys kezinde qaza tapqan 17 sarbazdyń súiegi tabyldy, dep habarlaidy QazAqparat.
Tasqala aýdany Merei aýylynda turatyn M. Mámetova atyndaǵy izdestirý jasaǵynyń komandiri Sergei Lapshin málim etkendei, atalmysh aýdanda biyl da izdestirý jumystary júrgizildi.
Sonyń nátijesinde izdestirý toby soǵys kezinde jaý bombasynan mert bolǵan 17 jaýyngerdiń súiegin qazyp shyǵardy.
S. Lapshinniń sózine qaraǵanda, bulardyń bári de 93-artilleriia divizionynyń jaýyngerleri bolýy kerek. Olar Stalingrad maidanyna bara jatqan kezde bombalaýǵa tap bolyp, qaza tapqan sekildi. Súiekten ózge qasyq, ýly gazǵa qarsy qoldanylatyn tumsha shyqty.
«Qazirgi tańda osy sarbazdardyń týma-týystary izdestirilýde. Ótken jyly 15 jaýyngerdiń súiegi tabylyp, Bókei ordasy aýdany ortalyǵy Saiqyn aýylynda qaita jerlengen bolatyn. Biyl solardyń biri - Vlas Golovkonyń týysy Viktoriia Lisniak Ýkrainadan habarlasty. Vlas Golovko onyń anasy Zinaida Kýrilonyń aǵasy eken. Sondyqtan jaqyny jerlengen jerden bir ýys topyraq berip jiberýdi ótindi. Kúni búgin osy máselemen ainalysýdamyn», dedi Lapshin.
Ekinshi dúniejúzilik soǵys kezinde Stalingrad maidanyna tiip turǵandyqtan, BQO-nyń Orda (qazirgi Bókei ordasy), Jánibek aýdandary soǵys jaǵdaiynda dep jariialanǵany belgili. Jaý ushaqtary osy aýdandar aýmaǵyn, ásirese, temirjol boiyn jii bombalap, sonyń saldarynan jaýyngerlermen qatar turǵyndar da qaza tapqan edi. Soǵystyń aiaqtalǵanyna 75 jyl ótse de, shaiqas izderi áli sairap jatyr.
