Batys Qazaqstan oblysynyń ákimi Ǵali Esqaliev Oral qalasynda aýyz sýdy shektep berý áli de jalǵasatynyn málim etti, dep habarlaidy "Ult aqparat".
Jaz bastalǵannan beri sý úilerge shekteýli merzimde berilýde. Ásirese, joǵary qabatta turatyn turǵyndar sýdyń joqtyǵyna jii shaǵymdanady. Onyń ústine sońǵy kezde kúnniń qatty ysyp ketýi halyqqa qiyn tiip otyr.
Oblys ákimi Ǵali Esqalievtiń aitýynsha, ótken jyldan beri káriz qubyrlarynda apat jiilep ketti. Qazirgi tańda M.Sholohov kóshesi boiynda 5 km qubyrdy aýystyrý jumystary júrgizilýde. Bul qaladaǵy eski qubyrlarǵa kúsh túsirýde.
Qazir karantinge bailanysty turǵyndardyń kópshiligi úilerinde otyr. Oǵan qosa jeke turǵyn úidegiler sýdy baqsha sýarýǵa paidalanýda. Osynyń saldarynan sýdy tutyný mólsheri artty.
«Kúni búgin aýyz máselesin sheshý baǵytynda qosymsha sharalardy qolǵa alyp jatyrmyz. Aitalyq, «Jaiyqjylýqýat» AQ-dan jylý-elektr ortalyǵynda temperatýrany tómendetý esebinen qosymsha sý berý máselesi sheshildi. Qosymsha sorǵy iske qosyldy. Degenmen sýdy ýaqyt boiynsha shektep berý jalǵasatyn bolady», - dedi óńir basshysy.
«Batys sý arnasy» JShS bas direktory Qaiyrǵali Imashevtiń sózine qaraǵanda, qazirgi tańda kásiporyn tolyq qýatynda jumys jasap jatqanymen, táýligine 56 myń tekshe metr sý qala qajetin ótei almaidy. Qalada jańa shaǵynaýdandar boi kóterýde. Qazirdiń ózinde táýligine 65-70 myń tekshe metr sý qajet.
«Jańa sý qoimasyn salý úshin birneshe jyl kerek. Toqpai kenishindegi sý qoryn zertteýdiń ózine eki jyl kerek. Al Trekin aýyly mańyndaǵy kenishte 11 skvajina qazyp, sorǵylarymen jańa rezervýar qoisaq, sý jetkilikti bolar edi. Bul úshin shamamen 24 mlrd teńge qarjy kerek. Qazir joba daiyndalýda», - dedi Q.Imashev.
«Batys sý arnasy» JShS basshysy qala turǵyndary baqshalaryn aýyz sýmen sýarýdy toqtatsa, sý jetkilikti bolatynyn jetkizdi. Osyǵan bailanysty qala ákiminiń orynbasary Miras Múlkái jeke turǵyn úilerge de sýdy shektep berý máselesi qarastyrylyp jatqandyǵyn aitty.
