Batys Qazaqstan oblysynyń ákimi Ǵali Esqaliev Aqjaiyq aýdanynda bolyp, óńirdegi blokposttardyń jumysymen tanysty, dep habarlaidy "Ult aqparat".
Oblysta kúsheitilgen karantin rejimi engizilýine bailanysty barlyǵy 90-ǵa jýyq blokpost qoiylsa, sonyń altaýy Aqjaiyq aýdanynda.
Atap aitqanda, tosqaýyl beketteri Shabdarjap aýylynyń tusynda, Alǵabas, Jaiyq ózeniniń sol jaq betinde Sarytoǵaidyń tusynda, Chapaev aýylyndaǵy qalqymaly kópiri tusy men Kaztalov baǵytyndaǵy tasjol boiynda jáne Chapaevtan Jańaqala baǵytyndaǵy tasjolda ornatylǵan.
Ár blokpostta aýysymmen 2 brigada qyzmet atqarady. Atyraý oblysymen shekaradaǵy Shabdarjap aýylyndaǵy jáne Alǵabas aýylynyń tusyndaǵy blokposttarda 4 sanitarlyq dáriger jáne 6 migratsiialyq, ýchaskelik, patrýldik politsiia inspektorlary qyzmet atqarýda.
Blokposttaǵy qyzmetkerler patrýldik avtokólikpen, qarý-jaraqpen, betperdemen, avtokólikti tirkeýge arnalǵan jýrnalmen, anketa paraqtarymen jáne basqa da qajetti qural-jabdyqtarymen (teplovizer, antiseptiktermen) qamtylǵan. Beketterdiń aldynda tiisti jol belgileri qoiylǵan.
Shabdarjap aýyly tusyndaǵy blokposttan barlyǵy 5176 avtokólik (jeńil kólik – 2733, jolaýshy tasymaldaýshy kólik – 95, júk kóligi – 2318) ótken. Post qyzmetshileri 13845 adamdy tekseristen ótkizgen. Sońǵy táýlik ishinde blokpost arqyly Shabdarjap aýyly boiyndaǵy blokposttan 285 mashina júrgen. Orta eseppen alǵanda atalǵan tasjoldan kúnine 250-ge jýyq avtokólik júrip ótedi eken.
-Aqparattyq jumystardyń arqasynda eki oblys arasyndaǵy jeńil kólikterdiń sany aitarlyqtai azaiǵanyn baiqaimyz. Ótip jatqan barlyq azamattar tekserilip, saýalnama toltyryp jatyr, - dedi Aqjaiyq aýdandyq politsiia bóliminiń bastyǵy Ertas Bisenov.
Oblys ákimi atalǵan blokpost boiynsha turǵyndar tarapynan jii kólik keptelisi oryn alatyny týraly shaǵym kelip túskenin aitty. Politsiia qyzmetkerleriniń aitýynsha, keptelis aýysymmen jumys isteitin adamdardyń blokpostty bir ýaqytta kesip ótý kezinde oryn alǵanyn jetkizdi. Eki oblys shekarasynan ótetin adamdardyń kóbi Aqtóbe oblysynyń azamattary eken.
«Barlyq tekserýlerden keiin olardy patrýldik avtokólikpen oblys aýmaǵynan shyǵaryp salamyz. Bizde beketti ainalyp ótý áreketi de anyqtaldy. Quqyq buzýshy ustalyp, hattama toltyryldy. Qyzý kóterilý jáne basqa da aýrý belgileri anyqtalǵan jaǵdaida biz shuǵyl túrde jedel járdem qyzmetin shaqyramyz», - dedi politsiia qyzmetkerleri.
Tekserý barysynda oblys ákimi politsiia jáne taýarlar men kórsetiletin qyzmetter sapasy men qaýipsizdigin baqylaý basqarmasynyń qyzmetkerleri júrgizetin jumystyń mańyzdylyǵyna toqtalyp, tekserýlerdi barynsha muqiiat júrgizý kerektigin atap ótti.
«Naqty saýalnama júrgizip, jazylǵan málimetterdi tolyq qadaǵalap otyrsaq, oblys aýmaǵynda syrqattanǵandardy anyqtaý jeńil bolady. Sonyń nátijesinde biz aýrý juqtyrǵan adam bola qalǵan jaǵdaida onyń oblysqa qaidan kelgenin anyqtap, bailanysta bolǵan adamdardy tez taba alamyz. Turǵyndarǵa túsindirme jumystaryn muqiiat júrgizip, olardyń saýalnama toltyrý kezinde jeke jaýapkershilikteri týraly esterine salyp otyrýdyń mańyzy zor», - dedi óńir basshysy blokposttaǵy qyzmetkerler brigadasyna.
