Batys Qazaqstan oblysynyń ákimi Ǵali Esqaliev koronavirýspen kúresip jatqan meditsina qyzmetkerlerimen beinebailanys arqyly sóilesti, dep habarlaidy "Ult aqparat".
Olardyń arasynda osy indetten emdelip jatqandar, sondai-aq aldyńǵy shepte eńbek etip júrgen meditsina qyzmetkerleri bar.
Óńir basshysy meditsina qyzmetkerlerine qoldaý bildirip, olardyń kóńil-kúiin, hal-jaǵdaiyn surap bildi.
«Naýqastarmen jaqyn qarym-qatynas olardy emdeýshi dárigerlerge juqtyrý qaýpin týǵyzady. Sizder óz borysh-mindetterińizdi adal atqaryp jatyrsyzdar, sol úshin alǵys aitamyz», - dedi ákim.
Oblysta 36 meditsina qyzmetkeri koronavirýs juqtyrsa, sonyń tórteýi jazylyp shyqty. Al oblystyq juqpaly aýrýlar aýrýhanasynda emdelip jatqandary ózderiniń psihologiialyq kóńil-kúii, qandai em alyp jatqandary jóninde áńgimelep berdi.
Ákim olardyń tezirek saýyǵyp, qatarǵa qosylýyna tilektestigin bildirdi. Karantin bitip, úilerine oralǵannan keiin meditsina qyzmetkerleriniń eńbegi eskerýsiz qalmaitynyn jetkizdi.
Oblys basshysy sondai-aq oblystyq juqpaly aýrýlar aýrýhanasynyń dárigerlerimen de sóilesti. Qazirgi kezde olar otbasyna qaýip tóndirmes úshin úi kórmei, jumys jasaýda.
«Koronavirýs indetimen búkil álem kúresip jatyr. Onyń birqatar elderdiń ekonomikasyna tigizip jatqan orasan zor ziiany soǵys salǵan lańnan kem emes. Bizdiń bárimiz qalypty ómirge oralý úshin sizderdiń atqaryp jatqan qyzmetterińiz asa mańyzdy», - dedi Ǵali Esqaliev.
Dárigerler jumysqa qajetti barlyq jaǵdaidyń jasalyp jatqanyn, árbir emdelýshiniń jai-kúii qaltqysyz baqylaýda ekendigin aitty.
Ǵ.Esqaliev dárigerlerden qandai ma bolsyn ózekti másele, usynys-tilekterin oblystyq densaýlyq saqtaý basqarmasynyń basshylyǵyna jasyrmai jetkizip otyrý kerektigin atap ótti.
«Bul máselede qysylyp-qymtyrylýdyń qajeti joq. Oblys tynyshtyǵy sizderdiń jumys sapańyzǵa bailanysty», dedi ákim.
Aita keteiik, 5 sáýir kúngi saǵat 22.50-degi málimet boiynsha BQO-da taǵy bir adamnyń koronavirýs juqtyrǵany belgili boldy. 32 jastaǵy meditsina qyzmetkeri buryn koronavirýspen aýyrǵan adammen qarym-qatynasta bolǵan. Sóitip ol da oblystyq juqpaly aýrýlar aýrýhanasyna ornalastyryldy.
Osylaisha BQO-da aýyrǵandar sany 199-ǵa jetip, sonyń 41-i emdelip shyqty.
