Batys Qazaqstan oblysynyń ákimi Ǵali Esqaliev óńirde qańǵybas itterdiń máselesi ótkir ekenin málim etti, dep habarlaidy QazAqparat.
«Óńirde qańǵybas itter máselesi ótkir tur. Qańǵybas itterdi aýlaý, chip taǵý jáne sterildeýge qatysty veterenarlyq qyzmetti memlekettik-jekeshelik áriptestik quzyretine bergenbiz. Bul baǵyttaǵy jumys 2 jyl boiy qarqyndy júrip keledi. Qańǵybas itter turǵyndardyń ómirine qaýip tóndirse «109» qyzmetine habarlasyp, aita alady. Ortalyqqa kelip túsken shaǵymdarǵa qatysty shuǵyl sheshim qabyldanady. Top bolyp júretin itterdi aýlap, adam ómirine qaýip tóndirgen jaǵdaida kózin joiý sharasy qoldanylady», - dedi Ǵali Esqaliev Ortalyq kommýnikatsiialar qyzmeti alańynda ótken baspasóz máslihatynda.
Aimaq basshysynyń málimetinshe, aýlanǵan buralqy itterdiń 20-25 paiyzynyń kózi joiylady. Qalǵanyn emdep, sterildep, chip taǵyp, qaita bosatady.
«Qańǵybas itterdi aýlaý máselesi qalalyq máslihatta qaralyp, qosymsha qarjy bólinedi. Óitkeni, turǵyndardan kelip túsetin shaǵym sany artyp otyr. Bizdiń óńirde qańǵybas ittermen kúresýde úlgi tutatyndai aýdandar da bar. Ol jerde itterdi arnaiy orynda ustap, kútip-baptaidy. Itterdi aýlap, olarǵa veterinarlyq qyzmet kórsetý boiynsha 3 jylǵa arnalǵan baiqaý ótti. Jobanyń quny 61 mln teńgeni quraidy. Qosymsha taǵy 8 mln teńge bólinetin bolady», - deidi ol.
