Tuqym, tyńaitqysh pen ósimdikterdi qorǵaý quraldary qunynyń bir bóligin arzandatýǵa baǵyttalǵan bazalyq sýbsidiialar saqtalady. Bul týraly Senatta depýtattarmen kezdesý barysynda QR Aýyl sharýashylyǵy ministri Saparhan Omarov málim etti, dep habarlaidy QazAqparat.
«Biz tiimsiz sýbsidiialardan bas tartyp, nátijege baǵdarlanǵan sýbsidiialarǵa kóshý arqyly qoldanystaǵy memlekettik qoldaý sharalaryn jetildirýdi usynamyz. Munda, aita keterligi, barlyq ózgerister budan buryn qabyldanǵan Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyna sáikes júzege asyrylatyn bolady. Atap aitqanda, bul qujatta áýel basta-aq ósimdik sharýashylyǵynda 2019 jyldan bastap, mal sharýashylyǵynda 2020 jyldan bastap taýarlyq-spetsifikalyq sýbsidiialardan arylý kózdelgen bolatyn. Kórsetilip otyrǵan memlekettik qoldaýdyń arqasynda salanyń investitsiialyq tartymdylyǵy ósýde, bul bizge negizgi kapitalǵa investitsiia tartý jónindegi nysanaly indikatorlardy oryndaýǵa múmkindik beredi», - dedi vedomstvo basshysy.
Onyń sózine qaraǵanda, búgingi kúni jalpy somasy 4,4 trln teńgege 113 investitsiialyq joba pysyqtaý jáne iske asyrý satysynda tur.
Osy oraida tiisti memlekettik qoldaý ólshemsharttary belgilenetin bolady.
«Birinshiden, ósimdik sharýashylyǵynda túsimdiliktiń artýyna kóptegen faktorlar barshasy jinalyp ta, jeke-jeke de áser etedi. Osyǵan súiene otyryp, biz tuqym, tyńaitqysh pen ósimdikterdi qorǵaý quraldary qunynyń bir bóligin arzandatýǵa baǵyttalǵan bazalyq sýbsidiialardy qaldyramyz. Mysaly, eger sharýashylyq tyńaitqysh qoldansa, sapaly tuqym satyp alsa, ýaqtyly himiialyq óńdeý júrgizse - túsimdilik eń kem degende gektaryna 7-8 tsentnerge joǵary bolady. Bul jerde ǵylym men biznestiń kúsh-jigerin biriktirý, ǵylymi ázirlemelerdi kommertsiialandyrý, ǵylymnyń bizneske baǵdarlanýy mańyzdy. Óitkeni ne sebý kerek, qandai tehnologiiamen jáne qandai merzimderde egý qajet ekenine tek ǵylym ǵana jaýap berip, biznestiń kómekshisine ainalýy tiis», - dedi S. Omarov.
Keler jyldan bastap biznestiń ǵylymi-zertteý jáne tájiribelik-konstrýktorlyq jumystar júrgizýge jumsaǵan shyǵyndary sýbsidiialanatynyn aita ketken jón.
Budan buryn habarlanǵandai, ministr Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyna ózgerister daiyndalǵanyn aitty.
