Aqtóbege jumys saparymen kelgen Premer-Ministr Baqytjan Saǵyntaev oblys aktivimen kezdesti, dep habarlaidy QazAqparat tilshisi.
Aqtóbege issaparymen kelgen Baqytjan Saǵyntaev «Jańajol» ken ornyn aralap, birqatar óndiris oryndarynyń jumysymen tanysty.
Meditsina, sport, óner salasyndaǵy jańa qurylystardy qarap, Aqtóbege ǵana emes, Astanaǵa da qajetti ortalyqtardyń jumysyn baǵamdady. Al oblys aktivimen kezdesý kezinde óndiris oryndaryn modernizatsiialaý, kadr daiyndaý, memlekettik-jekemenshik seriktestikti damytý baǵytynda tapsyrmalar berdi.
«Indýstriialandyrý 4.0» dep aitamyz. Qazaqstan boiynsha 600 kásiporynǵa taldaý júrgizildi. Taldaý qorytyndysy boiynsha kásiporyndardyń basym kópshiligi «Indýstriialandyrý 1.0», «Indýstriialandyrý 2.0» deńgeiinde qalyp qoiǵany anyqtaldy. Iaǵni, zaman talabyna sai kelmeidi. Salynyp jatqan kásiporyndar jańa tehnologiiany paidalanady, al burynǵy óndiris oryndaryna ózgeris engizýi kerek. Eger ózgeris bolmasa, básekege tótep bere almai, ónimderi satylmai qalady. Sońynda tarifti tómendetýdi, sýbsidiia suraidy. Bul durys emes. Óndiris orny tehnologiiany aýystyryp, ónimniń ózindik qunyn tómendetýi shart. Ekonomikany damytýda taý-ken, munai, shikizat satysynan ótip, áleýmettik ekonomikany, qyzmet kórsetý salasyn alǵa jyljytý kerek. Qarjylyq ainalymy 2 million teńgeden asatyn sharýashylyqty kóbeitip, mikrobiznesti shaǵyn jáne orta bizneske jetkizý qajet»,- dedi Úkimet basshysy Baqytjan Saǵyntaev.
Jiyn kezinde Premer-Ministr kadr daiyndaýǵa kóp kóńil bólýdi tapsyrdy. Altyn belgi iegeri, qyzyl diplomnyń iesin emes, ózindik oiy bar, óndiristi órge súireitin, innovatsiialyq kózqarasy basym mamandy daiyndaý jergilikti bilikke de tikelei bailanysty.
«Jańa ekonomikalyq damýǵa kóshemiz desek, bilikti kadr daiyndaý qajet bolady. Balabaqshadan bastap, ýniversitetke deiin eski tásilmen jumys istese, kadrdy qalai daiyndaimyz? Sondyqtan bilim salasyna kúsh salý kerek. Kolledjderdegi ádistemelerdi ózgertý shart. Mamandyqtardy naqtylap, olarǵa qalai bilim beriletini qadaǵalanǵany durys. Sebebi, kolledjderde bári eski ádispen qalyp qoiǵan.
Aqtóbedegi zaýytta injenerlerdiń qaidan ekenin suradym. Bári jergilikti jerden, biraq Qytaiǵa baryp tájiribe jinap keldi. Nege Qytaiǵa baryp oqidy? Bazany quryp, bilimdi jergilikti jerde berýge bolady. Bizde múmkindik bar. Eger bárin rettemesek, mamannyń bárin shetelden tasyp, shetelge oqytyp júre beremiz. Bul másele ýniversitetke de bailanysty. Biz balamyzdy joǵary oqý ornyna túsirýge talpynamyz. «Tiimdi me, sol jolmen júre me» degen suraq kóbine ata-anany oilandyrmaidy. «Joǵary bilim aldy, diplomy bar» degeni mańyzdy. Bálkim kolledjde oqysa, odan da jaqsy maman shyǵýy múmkin ǵoi.
Máselen, Frantsiiada «Mektep 42» degen oqý orny bar. 2 jyl oqidy, diplom bermeidi. Tegin oqýdan shyqqan adam aiyppul tóleidi. Onda qyzyl, kók diplom degen joq. Oqyp, sertifikat alǵan túlekti jumysqa alýǵa iri kompaniialar kezekke turady. Kásipker úshin suranysqa ie ónim shyǵarý úshin qyzyl diplomnyń qajeti joq. Oǵan óz isiniń sheberi, oiy men innovatsiialyq kózqarasy bar kadr kerek», - dedi Premer-Ministr Baqytjan Saǵyntaev.
