Almaty oblysyna qarasty Qarasai aýdandyq aýrýhanasynyń juqpaly aýrýlar bóliminde koronavirýs juqtyrǵan 7 naýqas jatyr.
Olardyń saýyǵyp aman-esen úilerine shyǵýyna dárigerler baryn salýda. Solardyń biri bólim meńgerýshisi Sáýle Baraqbaeva. Onyń úiine barmaǵanyna 20 kúnnen asyp ketti, dep habarlaidy QazAqparat.
Sáýle Baraqbaeva 30 jyldyq tájirbiesi bar infektsionist dáriger. Onyń aitýynsha, álemdi ábigerge salǵan koronavirýs derti adamazatqa jiberilgen synaq. Bul indetti úmit pen senim jáne jaýapkershiliktiń arqasynda jeńip shyǵýǵa bolady.
«Adamzat osy ýaqytqa deiin qanshama pandemiiany bastan ótkerdi. Sondyqtan bul pandemiiany da jeńip shyǵamyz. Oǵan úmit bar. Eń bastysy turyǵyndar óz densaýlyqtaryna nemqurailyq tanytpaýy qajet. Barlyq karantindik rejimdi saqtasa, kóp uzamai bul qiynshylyqtar artta qalady», – deidi bilikti dáriger.
Onyń aitýynsha, búgingi kúni juqpaly aýrýlar bóliminde koronavirýs juqtyrǵan 7 naýqas jatyr. Báriniń jaǵdaiy qanaǵatanarlyq. Buǵan deiin bir patsient saýyǵyp úiine shyǵarylǵan.
«Jalpy bólimde 9 dáriger, 45 medbike jáne 40 sanitarka jumys isteidi. 30 meditsina qyzmetkeri osy indetti emdeýge jumyldyrylǵan. Búginde 19 adam karantinde, 11-i jumysta. Mamandardyń úilerine barmaǵanyna bir aiǵa jýyqtady», – deidi bólim meńgerýshisi.
Sáýle Baraqbaevada otbasyn qatty saǵynǵan. Úi ishimen telefon arqyly qoly bosaǵanda ǵana sóilesedi.
«Meniń úige barmaǵanyma 20 kúnnen asyp ketti. Úide anam, joldasym jáne 12 jastaǵy qyzym bar. Bárin qatty saǵyndym. Olarmen qolym bosaǵanda beineqońyraý shalyp, sóilesemin. Men olardy, olar meni saǵynyp júr. Buiyrsa aman-esen otbasymen qaýysharmyn. Ázirge basty maqsatym naýqastarǵa kómektesý», – deidi Sáýle Baraqbaeva.
Elimizde qaýiptiligi asa joǵary, joǵary jáne ortasha degen úsh dárejege sai ústemaqy tólene bastady. Atalmysh bólim dárigerleri qaýiptiligi joǵary sanatqa jatatyndyqtan, soǵan sai ústemaqylaryn aldy.
«Osy joly jalaqyǵa qosymsha úkimetten ústemaqy tólendi. Bárimizdiń kartochkamyzǵa tústi. Úkimetke áripteseriminiń atynan alǵysymyzdy aitamyn. Bizdiń bólimshege koronavirýspen qarym-qatynasta bolǵan kisilerdi ákeledi. Solarǵa bizdiń dárigerler birinshi kómek kórsetedi. Bizdiń maqsatymyz ústemaqy alý emes naýqastardy emdep shyǵarý», - deidi ol.
Sondai-aq, ol adamdardy karantin rejimin saqtap, úiden shyqpaýǵa shaqyrdy.
