Bizde áli kúnge deiin monoqalalardy órkendetýge qatysty naqty ustanym men ortaq pikir joq. Bul týraly Ekibastuz qalasyna jumys sapary barysynda QR Prezidenti Qasym-Jomart Toqaev aitty, dep habarlaidy QazAqparat.
«Monoqalalardyń ekonomikasyn ártaraptandyrý airyqsha mańyzdy. Basqa da salalardy damytyp, jańa jumys oryndaryn ashý – asa ózekti másele. Bizde áli kúnge deiin monoqalalardy órkendetýge qatysty naqty ustanym men ortaq pikir joq», - dep keltirilgen Memleket basshysynyń sózi Aqordanyń Twitter-paraqshasynda.
Sondai-aq málim etilgendei, monoqalalarǵa arnalǵan keńeste Premer-Ministrdiń orynbasary Roman Skliar elimizdegi monoqalalardy damytý boiynsha baiandama jasady. Al monoqalalardy áleýmettik-ekonomikalyq damytý isinde «Samuryq-Qazyna» qory kompaniialarynyń róli týraly Almasadam Sátqaliev jetkizdi.
Budan bólek, Qaraǵandy oblysynyń ákimi Jeńis Qasymbek aimaqtaǵy 8 monoqalanyń áleýmettik-ekonomikalyq jaǵdaiy jáne damýy jóninde baiandasa, Pavlodar oblysynyń ákimi Ábilqaiyr Sqaqov Ekibastuz qalasyn damytý josparyn aityp ótti.
Qazaqstannyń birqatar monoqalasyn damytý boiynsha is-sharalar týraly ERG direktorlar keńesiniń tóraǵasy Aleksandr Mashkevich málim etti. «Qazaqmys Holding» direktorlar keńesiniń tóraǵasy Edýard Ogai kompaniianyń monoqalalardy damytýdaǵy róli týraly aitty.
Buǵan deiin habarlaǵanymyzdai, búgin Prezident Qasym-Jomart Toqaev jumys saparymen Pavlodar oblysynyń Ekibastuz qalasyna keldi.
Memleket basshysy jumys sapary barysynda monoqalalardy damytý jóninde keńes ótkizip, Prezidenttik jastar kadr rezerviniń ókilderimen kezdesedi. Sonymen qatar qaladaǵy indýstrialdy kásiporyndarǵa barady dep josparlanǵan.
