Foto: Akorda.kz
Qasym-Jomart Toqaev pen For Essozimna Gnassingbe eki memlekettiń resmi delegatsiialarynyń qatysýymen keńeitilgen quramda kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Qazaqstan Prezidenti Togo delegatsiiasyna iltipat bildire otyryp, dostas eki el arasyndaǵy diplomatiialyq qatynastardyń 10 jyldyǵy qarsańynda Astanada ótip jatqan bul sapardyń simvoldyq máni bar ekenin atap ótti.
– Búgingi kelissózder ekijaqty bailanystardyń jańa kezeńin aiqyndap, ózara tiimdi yntymaqtastyǵymyzdyń perspektivti baǵyttaryn zerdeleýge zor múmkindik beredi. Biz Togomen aradaǵy yqpaldastyqty nyǵaitýǵa múddelimiz jáne Sizdiń elińizdi Afrikadaǵy mańyzdy seriktes retinde qarastyramyz, – dedi Memleket basshysy.
Prezident eki eldiń bir-birinen alys jatqanyna qaramastan, ortaq tustary kóp ekenine, atap aitqanda, kópkonfessiialy jáne kópetnosty quramymen erekshelenetinine toqtaldy.
– Qazaqstanda 100-den astam etnos ókilderi turady. Konfessiiaaralyq jáne dinaralyq dialogty damytý – bizdiń memlekettik saiasatymyzdyń basym baǵyttarynyń biri, – dedi Qasym-Jomart Toqaev.
Memleket basshysynyń pikirinshe, Qazaqstan men Togo arasyndaǵy seriktestiktiń áleýeti áli tolyq paidalanylmai otyr. Ony damytý úshin ekijaqty qujattarǵa, sonyń ishinde investitsiialardy ózara qorǵaý týraly kelisimge qol qoiý qajet.
Qazaqstan Prezidenti ekijaqty saýda-sattyqty órkendetý jáne isker toptar arasyndaǵy bailanysty nyǵaitý mańyzdy ekenine toqtalyp, Qazaqstannyń Togodaǵy Qurmetti konsýly laýazymyna laiyqty kandidatty anyqtaýdy usyndy. Memleket basshysy mundai qadam eki el arasynda B2B formatyndaǵy bailanystardy damytýǵa septigin tigizedi dep esepteidi.
– Búkil álemdegi halyqaralyq yntymaqtastyqty nyǵaitýǵa atsalysý isinde Qazaqstan men Togo siiaqty memleketter meilinshe belsendi jáne konstrýktivti ról atqara alady dep sanaimyn, – dedi Memleket basshysy.
For Gnassingbe qurmet kórsetkeni úshin Qazaqstan tarapyna alǵys aityp, ózara múddeni kózdeitin ekonomikanyń túrli salalarynda yntymaqtastyq ornatýǵa beiildi ekenin rastady.
– Qazaqstanǵa saparmen kelýge shaqyrýyńyz bizdiń qarym-qatynasymyzǵa tyń serpin beredi. Qazaqstan men Togonyń strategiialyq seriktes bolýǵa múmkindigi bar. Sizdiń elińizdiń ekonomikalyq áleýeti zor. Bizdiń delegatsiia saýda, ekonomika, taý-ken, aýyl sharýashylyǵy, kólik, tsifrlandyrý salalaryndaǵy yntymaqtastyqty keńeitýge múddeli. Jan-jaqty bailanys ornatýǵa baǵyttalǵan kelissózderimiz qos taraptyń ózara yqpaldastyqty tereńdetýge nietti ekenin aiqyn kórsetti, – dedi Togo Prezidenti.
Memleketter basshylary Qazaqstan men Togo arasyndaǵy seriktestikti damytý perspektivalaryn talqylady. Sondai-aq kelissóz barysynda saiasi dialogty jolǵa qoiýǵa, saýda-ekonomikalyq, investitsiialyq, energetikalyq, kólik-logistikalyq jáne mádeni-gýmanitarlyq salalardaǵy yntymaqtastyqty keńeitýge, densaýlyq saqtaý jáne áskeri ónerkásip baǵytynda ózara yqpaldastyq ornatýǵa erekshe nazar aýdaryldy.
