Memleket basshysy Soltústik Qazaqstan oblysyndaǵy egin jinaý naýqanynyń barysymen tanysty, dep habarlaidy "Ult aqparat" Aqordaǵa silteme jasap.
Prezident Qasym-Jomart Toqaevtyń Soltústik Qazaqstan oblysyna jasaǵan jumys sapary Qyzyljar aýdany Báiterek aýylyndaǵy «Servis Jars» JShS-niń aýyl sharýashylyǵy alqabyna barýdan bastaldy. Memleket basshysy kásiporynǵa qarasty egistik jerlerdiń jaǵdaiymen tanysyp, egin jinaý jumystaryna paidalanylatyn aýyl sharýashylyǵy tehnikalaryn kórdi.
Qasym-Jomart Toqaev aýyl sharýashylyǵy kásipornynyń jetekshilerimen jáne mehanizatorlarmen áńgimelesý barysynda biylǵy Joldaýynda bul sala boiynsha tiisti mindetter júktegenin eske saldy.
– Biz sýbsidiia salasyndaǵy saiasatymyzdy jetildirip, retteýimiz kerek. Atalǵan máselege Joldaýymda arnaiy toqtaldym. Bul jerde bári aiqyn bolýy kerek. Bolashaqta sýbsidiialar múldem joiylyp, onyń ornyna paiyzy tómen nesieler bolady degen pikir bar. Alaida, qazirgi ýaqytta biz aýyl sharýashylyǵy taýarlaryn óndirýshilerge qoldaý kórsetýimiz qajet, – dedi Memleket basshysy.
Sonymen qatar Qasym-Jomart Toqaev daiyn ári óńdelgen ónimniń, sonyń ishinde unnyń eksportqa shyǵarylý kólemi tómendegenin atap ótip, qolaily tarif saiasaty qajet ekenine nazar aýdardy.
– Biz dástúrli túrde Ózbekstan, Túrikmenstan, Aýǵanstan elderiniń naryǵyna un jetkizemiz. Jalpy Úkimet, Saýda minsitrligi tarifti retteý máselesimen naqty ainalysýǵa tiis. Úkimet keleshekte astyqqa eksport salyǵyn engizý máselesin kóterip otyr. Biraq, qazir qalyptasqan ahýaldy eskere otyryp, buǵan áli erte dep oilaimyn. Sondyqtan taýar óndirýshilerge, ásirese un shyǵaratyn kásipkerler úshin sýbsidiia mehanizmin qaita iske qosýymyz kerek. Biz qosymsha qunynyń deńgeii joǵary daiyn ári óńdelgen ónimderdi eksporttaýǵa tiispiz, – dedi Prezident.
Memleket basshysy agroónerkásip keshenin ozyq tehnikamen qamtamasyz etý qajet ekenine nazar aýdardy.
– Úkimet aýyl sharýashylyǵy eńbekkerlerin osyndai tehnikalarmen qamtamasyz etýge kómek berýi kerek. Eger zamanaýi tehnika bolmasa, bizdiń aýyl sharýashylyǵymyz damymaidy. Bul – anyq dúnie. Sondyqtan Úkimet meniń tapsyrmam boiynsha tiisti jumystardy jalǵastyrady. Ekinshiden, bul tehnikalar aýyl sharýashylyǵy eńbekkerlerine qol jetimdi bolýy kerek. Nesiege qatysty saiasat jalǵasa beredi. Nesie mólsheri tómen bolýy tiis. Men bul máselege basa mán beremin, – dedi Qasym-Jomart Toqaev.
Budan bólek Prezident óńirdiń áleýmettik-ekonomikalyq damýy men agroónerkásip kesheniniń jaǵdaiy týraly Soltústik Qazaqstan oblysynyń ákimi Qumar Aqsaqalovtyń esebin tyńdady.
