Diplomatiia nátije berý úshin biz bir-birimizben dialog qurýymyz kerek. Bul týraly Miýnhen qaýipsizdik konferentsiiasynyń tóraǵasy Volfgang Ishinger málim etti, dep habarlaidy QazAqparat.
«Biz munda Tramp Ákimshiligi ókiliniń kelgenin rizashylyqpen atap ótkim keledi. Sonymen qatar, biz osy konferentsiiaǵa Irannyń da ókilderin shaqyramyz. Eger de diplomatiia nátije bergenin kórgimiz kelse, biz bir-birimizben dialog qurýymyz kerek. Iaǵni bul turǵyda bir-birimiz jaiynda syrttai talqylaǵannyń qajeti joq dep oilaimyn. Atap aitqanda, Soltústik Koreia ókilderi bizdiń konferentsiiaǵa qatysýǵa sheshim qabyldasa, onda osy eldiń ustanymyn tyńdaý úshin olardy da tyńdaýǵa daiynbyz. Sondyqtan bul ustanym bizdiń maqsattar men mindetterdiń mańyzdy bóligi bolýy tiis dep sanaimyn», - dedi V. Ishinger Miýnhen qaýipsizdik konferentsiiasynyń 56-shy otyrysynda.
Eske sala keteiik, konferentsiia barysynda Volfgang Ishinger álemdik kóshbasshylardy BUU-nyń bedelin nyǵaitýǵa belsendi atsalysýǵa shaqyrdy.
Budan buryn habarlanǵandai, Memleket basshysy Qasym-Jomart Toqaev Germaniiadaǵy Miýnhen qaýipsizdik konferentsiiasyna qatysýda.
Miýnhen qaýipsizdik konferentsiiasynyń 56-shy otyrysy 2020 jyldyń 14-16 aqpany aralyǵynda ótedi. Atalǵan is-sharaǵa 40-qa jýyq memlekettiń basshylary, 100-den astam syrtqy ister jáne qorǵanys ministrleri, halyqaralyq qatynastar salasyndaǵy bedeldi sarapshylar, Eýrokomissiia ókilderi, sondai-aq Eýropalyq parlament depýtattary qatysýda. Aita keteiik, jyl saiyn forýmǵa álemniń 70 elinen 400-600 adam qatysyp keldi. Olardyń arasynda memleket jáne úkimet basshylary, áskeri ári saiasi kóshbasshylar, ministrler kabinetiniń músheleri, parlament depýtattary, ǵalymdar, saiasattanýshylar, azamattyq qoǵam ókilderi qamtyldy.
