Májilis depýtaty Baqytbek Smaǵul Memleket basshysy Qasym-Jomart Toqaevtyń el halqyna arnaǵan Joldaýyna qatysty pikir bildirdi, dep habarlaidy QazAqparat.
«El Prezidenti Qasym-Jomart Kemeluly Toqaevtyń Joldaýyn bir sózben túiindeýge bolady: QORǴAÝ! Eń bastysy, halyqty qorǵaý. Ozyq memleket úshin halqyn qorǵaýdan qundy eshteńe joq. Budan bólek, Memleket basshysynyń Joldaýynda táýelsizdikti, memlekettilikti, ulttyq múddelerdi, ulttyq qundylyqtardy, ult saýlyǵyn, bolashaqty, jas urpaqty, daryndardy, mádeniet pen ónerdi, ekonomikany, ekologiiany, eńbekti qorǵaý sekildi san-salaly máseleler qamtyldy. Qazirgi almaǵaiyp shaqta bul kemeline kelgen, ál-aýqaty men qairat-qýaty tolysqan elderdiń qolynan ǵana keletin dúnie», - dedi B. Smaǵul.
Onyń aitýynsha, Joldaýda el ómiriniń saiasi, áleýmettik, ekonomikalyq, áskeri jáne basqa da qyrlary tolyqqandy qamtyldy.
«Prezident Joldaýy memleketimizde, qoǵamda, álemde, ainalada bolyp jatqan ózgeristerdi kórip-bilip, kókeige toqyp, kóp izdenýdiń jemisi ekeni anyq. Prezident Táýelsizdikti, el men jerdiń bútindigin, halyqty, ult pen memlekettik múddeni qorǵaý jolynda bar kúsh-jigerin salyp, jan aiamai eńbek ete beretinin jáne sony biliktegi árbir tulǵadan talap etetinin nyq aitty. Endeshe, Prezidentimiz Qasym-Jomart Toqaevtyń bul Joldaýy eldi rýhtandyrady, qoǵamǵa oi salady, ár salanyń damýyna serpin beredi. Sóitip, Qazaqstannyń jańa zaman tórinen, jańa álem órinen laiyqty oryn alýyna súbeli úles qosady degen senimdemin», - dedi depýtat.
«Bul jolǵy Joldaýdyń taǵy bir qundylyǵy sol, Memleket basshysy strategiialyq basymdyqtar syrtynda 5 naqty prezidenttik bastamasyn jariia etti. Birneshe million qazaqstandyqty qamtityn bul bastamalar azamattardyń kókeikesti problemalaryn sheshýge baǵyttalǵan. Osynyń arqasynda Qazaqstan halqynyń áleýmettik jaǵdaiy, turmys deńgeii, ál-aýqaty órleýge bet alady degen úmittemin», - deidi Baqytbek Smaǵul.
