Biyl Ulttyq biryńǵai testileýden 1900-den astam ǵana talapker 120 baldan joǵary jinai aldy. Bul týraly QR Bilim jáne ǵylym vitse-ministri Qýanysh Erǵaliev aitty, dep habarlaidy "Ult aqparat".
«Ulttyq biryńǵai testileýge naqty 145 288 talapker qatysty. Onyń ishinde 75,5 paiyzy qazaq tilinde, 24,3 paiyzy orys tilinde jáne 350 adam, iaǵni 0,2 paiyzy aǵylshyn tilinde tapsyrdy. Biyl UBT-nyń ortasha baly 69,08 ball boldy. Ótken jylmen salystyrǵanda ortasha ball 5 balǵa artty. Al shekti baldy 65 paiyzy jinady jáne 39,4 paiyzy shekti baldan óte almady», - dedi vitse-ministr ministrliktiń apparat jinalysynda.
Onyń atap ótýinshe, ortasha baldyń ósýine oqýǵa túsýshilerdiń UBT tapsyrýǵa 2 múmkindiginiń bolýy áser etti.
«Osylaisha olar óz nátijelerin jaqsartý úshin daiyndalýǵa múmkindik aldy. Sonymen qatar elektrondy formatty engizý arqyly talapkerlerdiń jaýaptaryn túzetýge, test tapsyrmalaryn sheshýge ýaqyt jetkilikti boldy. 1 923 túsýshi 120 balldan joǵary aldy. Eń joǵary ball – 140 balldy bir talapkerimiz jinady. Ol - Pavlodar qalasynan Daniiar Ýáliev degen oqýshymyz. Byltyrmen salystyrǵanda eń joǵary ball 139 boldy. Ony da bir talapker jinady», - dedi Qýanysh Erǵaliev.
