Osy jylǵy 5 aiynyń qorytyndysy boiynsha ishki jalpy ónimniń ósý qarqyny 1,6 paiyzdy qurady. Bul týraly Senattyń jalpy otyrysynda QR Ulttyq banki tóraǵasynyń orynbasary Aqyljan Baimaǵambetov málim etti, dep habarlaidy QazAqparat.
«Álemdik jáne ulttyq ekonomika 2020 jyly koronavirýs pandemiiasynyń taralýy aiasynda tereń daǵdarysqa ushyrady. Engizilgen lokdaýndar men qatań karantin shekteýleriniń nátijesinde Qytaidy qospaǵanda, búkil álemde ekonomikalyq belsendilik edáýir qysqardy. Halyqaralyq Valiýta Qorynyń baǵalaýy boiynsha álemdik ishki jalpy ónimniń jalpy tómendeýi 2020 jyly 3,3% boldy. Osy jaǵdailarda Qazaqstanda iskerlik belsendilikti jáne jumyspen qamtýdy qoldaý úshin Memleket basshysynyń bastamalary boiynsha Úkimet pen Ulttyq Bank ishki jalpy ónimniń 9%-y (6,3 trln teńge) mólsherinde buryn-sońdy bolmaǵan daǵdarysqa qarsy sharalar toptamasyn qabyldady. Sol somanyń 2,3 trln teńgesin Ulttyq bank qarjylandyrdy. Ekonomikanyń zardap shekken sektorlaryndaǵy kásiporyndardy qoldaý, halyqtyń iskerlik belsendiligi men jumyspen qamtylýyn qamtamasyz etý, importqa táýeldilikti tómendetý jáne azyq-túlik qaýipsizdigin arttyrý, sondai-aq «Nurly jer» memlekettik baǵdarlamasyn iske asyrý úshin qarajat bólindi», - dedi A. Baimaǵambetov 2020 jylǵy biýdjettiń atqarylýyna qatysty Úkimettiń jáne Esep komitetiniń esepterin qaraý barysynda.
Onyń aitýynsha, biylǵy 2-toqsannan bastap ulttyq ekonomika oń ósý aimaǵyna shyqty. Osy jylǵy 5 aidyń qorytyndysy boiynsha ishki jalpy ónimniń ósý qarqyny 1,6%-dy qurady. Qyzmet kórsetý sektorynyń jandana túsýi, ekonomikanyń shikizat emes sektorlarynda joǵary investitsiialyq belsendiliktiń saqtalýy ekonomikany qalpyna keltirýge yqpal etip otyr.
Budan buryn habarlanǵandai, Qarjy ministri Erulan Jamaýbaev biýdjettiń basym baǵyttary tótenshe jaǵdai kezinde azamattardy jáne naqty sektordy qoldaýǵa arnalǵan shyǵystar bolǵanyn aitty.
