Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Shetelde kadrlar daiarlaý jónindegi respýblikalyq komissiianyń kezekti otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Biyldan bastap Memleket basshysynyń tapsyrmasy boiynsha 500 qazaqstandyq ǵalym memleket esebinen shetelde taǵylymdamadan ótedi.
Ozyq ǵylymi tehnologiialardy transfertteý maqsatynda Memleket basshysy Q.Toqaevtyń «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynda 500 ǵalymnyń álemdegi jetekshi zertteý ortalyqtarynda jyl saiyn taǵylymdamadan ótýin qamtamasyz etýdi tapsyrǵany belgili.
Jiyndy ashqan Memlekettik hatshy búginde túrli sala mamandaryna ózderiniń kásibi bilimderin jańartýǵa múmkindik beretin qysqa merzimdi oqytýdyń nemese taǵylymdamanyń mańyzdylyǵy artyp kele jatqanyn atap ótti. Buǵan «Bolashaq» baǵdarlamasy boiynsha úmitkerler arasyndaǵy úlken konkýrs dálel. Osyǵan bailanysty halyqaralyq baǵdarlama sheńberinde ǵalymdar úshin taǵylymdamalardyń arnaiy sanaty bekitildi.
Otyrys barysynda komissiia mynadai sanattar boiynsha taǵylymdamalardy bekitti: ǵalymdar, densaýlyq saqtaý salasyndaǵy qyzmetkerler, pedagogtar, memlekettik qyzmetshiler, injenerlik-tehnikalyq qyzmetkerler.
Bilim jáne ǵylym ministri Ashat Aimaǵambetovtiń aitýynsha, taǵylymdama sanattarynyń tizimin qalyptastyrý kezinde memlekettik organdar men múddeli uiymdardan kelip túsken ótinimder negizinde naryqtyń naqty qajettiligine taldaý júrgizilgen. Jalǵasyp jatqan pandemiia jaǵdaiyndaǵy jańa syn-qaterlerdi eskere otyryp, ǵylymi, meditsinalyq jáne injenerlik-tehnikalyq qyzmetkerlerdiń taǵylymdamalaryna basymdyq beriledi.
Otyrys qorytyndysy boiynsha Memlekettik hatshy Qyrymbek Kósherbaev «Bolashaq» halyqaralyq stipendiiasyn iske asyrýdyń tetikterin odan ári jetildirý jáne onyń tiimdiligin arttyrý jóninde birqatar tapsyrma berdi.
