Sońǵy 5 jylda jańartylatyn energiia kózderi nysandarynyń belgilengen qýaty shamamen 7 ese ósti. Bul týraly QR Energetika ministri Nurlan Noǵaev málim etti, dep habarlaidy QazAqparat.
«Damýdyń uzaq merzimdi trendtterin taldaý energiianyń kómirteksiz kózderi aitarlyqtai suranysqa ie ekendigin kórsetedi. Qazaqstannyń energetikalyq júiesiniń damý vektorlarynyń biri - sońǵy bes jylda jańartylatyn energiia kózderi. Prezident orta merzimdi kezeńde ekonomikanyń ósimi meilinshe «jasyl ekonomika» jaǵdaiynda ilgerileýge tiis degen tapsyrma berdi. Óz kezeginde, biz «Jasyl» ekonomika tujyrymdamasy aiasynda ózimizge alǵan mindettemelerdi oryndap, eldiń jalpy energiia teńgerimindegi jańartylatyn energiia úlesin 3 paiyzǵa deiin jetkizdik. Sońǵy 5 jylda jańartylatyn energiia kózderi nysandarynyń belgilengen qýaty shamamen 7 esege – 2015 jylǵy 240 MVt-tan 2020 jyly 1634,7 MVt-qa deiin ósti», - dedi N. Noǵaev Energetika ministrliginiń keńeitilgen alqa májilisinde.
Onyń aitýynsha, 2020 jyldyń qorytyndylary boiynsha elimizde jumys istep turǵan 115 jańartylatyn energiia kózderi nysany bar, olardyń jiyntyq qýaty - 1634,7 MVt (Jel ES – 486,3 MVt; Kún ES – 911,6 MVt; Sý ES - 229,04 MVt; BioES - 7,82 MVt).
2020 jyldyń qorytyndysy boiynsha jańartylatyn energetika nysandary óndiretin elektr energiiasynyń kólemi 3,2 mlrd kVt/saǵ qurady.
«Aita ketý kerek, osy salaǵa shamamen $1,5 mlrd investitsiia tartylyp, 1310 turaqty jumys orny quryldy, sondai-aq el óńirlerinde jyl saiyn shamamen 3000 ýaqytsha jumys orny ashylyp keledi. 2021 jyly jalpy qýaty 381,1 MVt bolatyn 23 jobany iske asyryp, shamamen 370 mln dollar investitsiia tartý josparlanǵan. Biyl shamamen 3,5 mlrd kVt/saǵ jańartylatyn energiia óndirý josparlanyp otyr», - dedi ministr.
Onyń sózine qaraǵanda, 2021 jyly jańartylatyn energiia kózderi boiynsha onlain-aýktsiondar ótkizý úshin platformany odan ári damytý josparlanǵan.
